“Asossiz ‘snos’larga barham beriladi”. Senat yer uchastkalarini kompensatsiya evaziga jamoat ehtiyojlari uchun olib qo‘yish tartibiga oid qonunni ma’qulladi

Senatning 26-yalpi majlisida “Yer uchastkalarini kompensatsiya evaziga jamoat ehtiyojlari uchun olib qo‘yish tartib-taomillari to‘g‘risida”gi qonun ma’qullandi. Bu haqda “Daryo” muxbiri xabar bermoqda.

Senat raisi Tanzila Norboyevaning ta’kidlashicha, mazkur qonun orqali yer uchastkalari masalasida aholini qiynab kelayotgan muammolarga barham beriladi.

“Qonun davlat idoralari tomonidan o‘zboshimchalik bilan yer uchastkalarini olib qo‘yish, bino va inshootlarni buzib tashlash holatlariga chek qo‘yadi. Asossiz ‘snos’larga barham beriladi. Bundan buyon yer uchastkalari jamoat ehtiyojlari uchun olib qo‘yilishida mulk huquqining ustuvorligi, xususiy mulkning daxlsizligi, ochiqlik va shaffoflik ta’minlanadi”, – dedi Senat raisi.

Qonunga ko‘ra, yer uchastkalarini jamoat ehtiyojlari uchun olib qo‘yilishi munosabati bilan zararlarni o‘rnini qoplash bo‘yicha respublika va hududiy darajada jamg‘armalar hamda kompensatsiya komissiyalari tashkil etiladi. Shu bilan birga, yer uchastkasini olib qo‘yish bo‘yicha tashabbus mahalliy kengashlarning majlislarida OAV va jamoatchilik vakillari ishtirokida ochiq ko‘rib chiqiladi, natijalari e’lon qilinadi.

Ma’lum qilinishicha, qonunda yer uchastkalarining kompensatsiya evaziga jamoat ehtiyojlari uchun olib qo‘yilishiga asos bo‘ladigan holatlarning aniq ro‘yxati ko‘rsatilmoqda. Yer uchastkalarining har qanday boshqa maqsadlarda olib qo‘yilishini jamoat ehtiyojlari uchun olib qo‘yish sifatida talqin etish qat’iyan ta’qiqlanmoqda.

Qonunda belgilanishicha, buzilishga tushgan hududda joylashgan yerga bo‘lgan huquq mavjud bo‘lmay turib, 15 yil davomida ko‘chmas mulkka halol, oshkora va uzluksiz egalik qilib kelgan shaxslarga ham ushbu ko‘chmas mulk obyekti uchun soliqlar to‘lab kelingani tasdiqlangan taqdirda, mazkur ko‘chmas mulk obyekti qiymatining o‘rni qoplanadi.

Qonun bilan Qoraqalpog‘iston Respublikasi Jo‘qorg‘i Kengesi, xalq deputatlari mahalliy Kengashlari huzurida kompensatsiya komissiyalari tuzilishi belgilanmoqda. Mazkur komissiyalar kompensatsiyalar o‘z vaqtida va to‘liq hajmda berilishi ustidan muntazam monitoring va berilgan kompensatsiyalarning hisobi yuritilishini ta’minlaydi. Hujjatda jamoat ehtiyojlariga olib qo‘yiladigan yer uchun beriladigan kompensatsiya turlari va manbalari ham aniq ko‘rsatilgan. Xususan, beriladigan kompensatsiya turlari pul mablag‘lari, shu jumladan turar joylarni va yashash uchun mo‘ljallanmagan joylarni vaqtinchalik ijaraga olish uchun pul mablag‘lari, boshqa ko‘chmas mulk obyektini mulk qilib berishdan iborat.