Chevrolet kompaniyasi Equinox yangi elektrokrossoverining tizer kampaniyasini davom ettirmoqda. Bu safar qisqa rolikda modelning saloni, xususan, multimedia tizimi uchun mo‘ljallangan ulkan ekran, raqamli qurilmalar paneli va miltillovchi “podveska”si namoyish etilgan. Rolikda havo deflektorlarining noodatiy dizayniga alohida e’tibor qaratilgan, deb xabar beradi Motor.
Videoda ko‘rsatilganidek, panelga o‘rnatilgan atmosfera “podveska”si bir necha xil rangga ega bo‘lgan, rangli tasvir esa to‘rli tuzilishga ega. Virtual qurilmalar va multimedia tizimining ekrani bitta oyna ostiga joylashtirilmasdan, alohida o‘rnatilgan. Shuningdek, rolikda “yo‘qolib qoluvchi” markaziy tunnel namoyish etilgan bo‘lib, unda mayda buyumlarni saqlashga mo‘ljallangan bo‘lma mavjud.
Krossover Silverado EV pikapi kabi Ultium modul platformasida ishlab chiqarilgan. Mashina bir marta quvvatlanish orqali 400-480 kilometr yo‘l bosishga qodir akkumulyator bilan jihozlangan. Avvalroq Equinox EV hamyonbop model bo‘lishi haqida aytilgandi. U Amerika dilerlari tomonidan bir yildan so‘ng sotuvga chiqariladi.
Chevrolet Equinox EV bozorga 2023-yilning kuzida chiqishi kutilmoqda — modelning ham batareyali, ham benzinli variantlari bir vaqtda sotilaveradi. Dastlabki hisob-kitoblarga ko‘ra, elektromotorga ega Equinox 30 ming dollar atrofida bo‘ladi.
Avvalroq Xitoyda Roewe RX5 yonga siljitish mumkin bo‘lgan ulkan ekranga ega bo‘lgani to‘g‘risida xabar berilgandi.
Izoh (0)