“Neftchi” “Navbahor” maydonida 11 yildan buyon g‘alaba qozona olmayapti

“Neftchi” Superliganing 9-turida “Navbahor” bilan 0:0 hisobida durang o‘ynadi.

Farg‘onaliklarning Namangandagi omadsiz seriyasi davom etdi. “Neftchi” so‘nggi bor “Navbahor” maydonida 2011-yil g‘alaba qozongan (2:0). Shundan buyon ikkala jamoa Namanganda 8 marta to‘qnash keldi va ushbu bellashuvlarning 3 tasida mezbonlar g‘alaba qozongan bo‘lsa, qolgan 5 tasida durang natija qayd etilgan.

Bu “Navbahor” va “Neftchi” o‘rtasida O‘zbekiston chempionati doirasidagi 55-o‘yin bo‘ldi. Unda 26 marta Farg‘ona jamoasi zafar quchgan bo‘lsa, 13 uchrashuv “lochinlar” foydasiga hal bo‘lgan, yana 16 marta durang natija qayd etilgan. To‘plar nisbati — 80:54.

Qayd etish kerak, “Neftchi” Superligadagi golsiz seriyasi 350 daqiqaga yetdi. So‘nggi bor jamoa 6-turda “Dinamo” darvozasini ishg‘ol qilgandi.

Superliganing 9-tur bahslaridan so‘ng “Navbahor” 17 ochko bilan 1-pog‘onani egallab turibdi, “Neftchi” esa 6 ochko bilan 13-o‘rinda bormoqda.