Buxoroda ikki nafar farzandiga aliment to‘lashdan bo‘yin tovlab kelgan ota 15 sutka qamoq jazosi tayinlanganidan so‘ng, xotini bilan yarashdi. Bu haqda “Daryo”ga MIB viloyat boshqarmasi matbuot xizmati rahbari Ixtiyor Olimov xabar berdi.
Ta’kidlanishicha, Buxoro tumanida yashovchi fuqaro J.Z. qariyb to‘rt yildan buyon ikki nafar farzandining moddiy ta’minoti uchun aliment to‘lamay kelgan. Oilaviy kelishmovchilik sabab 2019-yilda erining uyidan chiqib ketgan fuqaro Z.Q. 2021-yilda aliment undiruvi bo‘yicha Fuqarolik ishlari bo‘yicha Buxoro tumanlararo sudiga murojaat qilgan. Sud buyrug‘ini ta’minlash uchun byuroning tuman bo‘limi davlat ijrochisi tomonidan bir necha bor ogohlantirishlarga qaramay, qarzdor J.Z. aliment to‘lovidan qochib yurgan.Jinoyat ishlari bo‘yicha Peshku tuman sudi qaroriga ko‘ra, javobgarga nisbatan 15 sutka qamoq jazosi tayinlangach, qarzdor xotini bilan yarashib, birga yashashga qaror qilgan. Shundan so‘ng u Jinoyat ishlari bo‘yicha Buxoro tuman sudi ajrimiga asosan jinoiy javobgarlikdan ozod qilingan.
“Aliment to‘lovidan qochib yurgan fuqaro kamida 8 million so‘mdan ortiq qarzini amalga oshirishi kerak edi. Ular yarashish huquqidan foydalanishgani uchun qarzdor endi javobgar sanalmaydi”, — dedi Ixtiyor Olimov.
Izoh (0)