Davlat xavfsizlik xizmatining Samarqand viloyati bo‘yicha boshqarmasi xodimlari boshqa huquqni muhofaza qiluvchi organlar bilan hamkorlikda bir nechta tezkor tadbirlar o‘tkazdi.
Jumladan, viloyat Tadbirkorlikka ko‘maklashish markazining Samarqand shahar bo‘linmasi mutaxassisi chorvachilik bilan shug‘ullanmoqchi bo‘lgan tadbirkordan 35 ming dollar olgan vaqtida ushlangan. Aniqlanishicha, u Nurobod tumanidagi mas’uliyati cheklangan jamiyatlardan biriga tegishli 78 gektar lalmi yer maydonini 135 ming dollar evaziga tadbirkor nomiga rasmiylashtirib berishni va’da qilgan.
Shuningdek, Vazirlar Mahkamasi huzuridagi Agrosanoat majmui ustidan nazorat qilish inspeksiyasining Samarqand tuman bo‘limi katta inspektori o‘ziga tegishli fermer xo‘jalikning 20 gektar yer maydonini 50 ming dollarga sotishga kelishib, oldindan 25 ming dollar olgan vaqtida ushlangan.
Boshqa bir holatda esa Past Darg‘om tumanida yashovchi 47 yoshli shaxs o‘zi ish boshqaruvchi vazifasida faoliyat yuritayotgan fermer xo‘jalikning 6 gektar yer maydonini mansabdor tanishlari orqali xaridor nomiga rasmiylashtirib berish evaziga talab qilingan 170 ming dollardan 20 ming dollarni olgan vaqtida ushlangan.
Hozirda barcha holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Avvalroq Sirdaryoda yer uchun hokim qarorini chiqartirib, kadastr hujjatini rasmiylashtirib berish evaziga 60 ming dollar so‘ragan shaxs ushlangani, Toshkent viloyatida 2 gektar sug‘oriladigan yerni 500 ming dollarga rasmiylashtirib berishni va’da qilgan jamiyat rahbari qo‘lga olingani to‘g‘risida xabar berilgandi.
Mavzuga doir:
- O‘zbekistonda to‘rt oyda 2,2 ming gektardan ortiq yer o‘zboshimchalik bilan egallangani ma’lum bo‘ldi
- Namanganda kam ta’minlangan oilalarga ajratilgan 1 gektar yerni 80 mln so‘mga sotmoqchi bo‘lgan shaxs ushlandi
- Davlat kadastrlari palatasi Nurobod tuman filiali mutaxassislari 2 mln so‘m pora bilan ushlandi
Izoh (0)