“Real” top-5 ligalarda “Yuventus”ning rekordini yangiladi

Madridning “Real” klubi Ispaniya chempionatining 34-turida “Espanyol”ni mag‘lub etib (4:0), muddatidan avval chempionlikni qo‘lga kiritdi.

Bu “Real” uchun 1989/90-yilgi mavsumdan keyin eng erta qo‘lga kiritilgan chempionlik bo‘ldi. 32 yil avval ham jamoa mavsum tugashiga to‘rt tur qolganda masalani hal qilgandi. O‘shandan keyin madridliklar 9 marta La Liga bosh sovriniga ega chiqdi.

“Qaymoqranglilar” Primerada 35-marta chempionga aylandi. Bu orqali Madrid jamoasi A Seriyaning 34 karra g‘olibi “Yuventus”ni ortda qoldirib, top-5 ligalar klublari orasida eng ko‘p chempionlikka erishgan jamoaga aylandi.

Karlo Anchelotti boshchiligidagi jamoa 34 o‘yinda 81 ochko to‘pladi va eng yaqin ta’qibchi “Sevilya”ni 17 ochkoga ortda qoldirmoqda. “Real” keyingi o‘yinni 8-may kuni “Atletiko”ga qarshi o‘tkazadi.