Elnur Abduraimov harakat qiladigan vazn toifasida ikkita chempionlik kamari uchun jang o‘tkazildi

Toshkent vaqti bilan 1-may tongida AQShning Las-Vegas shahrida professional boks oqshomi bo‘lib o‘tdi.

Boks kechasining asosiy jangi super yarim yengil (-59 kg) vazn toifasida WBO kamari sohibi Shakur Stivenson (18-0, 9 KO) va WBC chempioni Oskar Valdes (30-1, 23 KO) o‘rtasida kechdi.

To‘liq 12 raund davom etgan jangda Stivenson ochkolar evaziga g‘alabani qo‘lga kiritdi — 117:110, 118:109, 118:109.

Shu tariqa AQSh vakili WBO va WBC kamarlari egasiga aylandi. Super yarim yengil vazn toifasida WBA kamari Rojer Gutyerresga, IBF kamari esa Kenichi Ogavaga tegishli.

Mazkur divizionda o‘zbekistonlik bokschi Elnur Abduraimov (8-0, 7 KO) harakat qiladi. Elnur o‘zining navbatdagi jangini 7-may oqshomida Manuel Korreaga (11-0, 7 KO) qarshi o‘tkazadi.