UEFA Chempionlar Ligasida “to‘rt finalchi” tizimini joriy etmoqchi

UEFA Chempionlar Ligasi formatini o‘zgartirish haqida o‘ylab ko‘rmoqda.

Musobaqa yarim final bosqichida odatdagidek ikki o‘yindan iborat qarama-qarshiliklar o‘rniga “to‘rt finalchi” tizimi joriy etilishi mumkin, deya xabar beradi The Times.

“To‘rt finalchi” formatida yarim final juftliklari g‘oliblari uy-safar tizimida emas bitta o‘yin orqali aniqlanadi. Unga ko‘ra, yarim final va final bir hafta ichida bitta shaharda o‘tkazilishi mumkin.

Ushbu taklif Yevropa klublar assotsiatsiyasi (ECA) tomonidan Chempionlar Ligasi pley-off formatini isloh qilish maqsadida ilgari surilgan. 2024/25-yilgi mavsumdan boshlab Chempionlar Ligasini o‘tkazish tizimidagi mumkin bo‘lgan o‘zgarishlar haqida gap ketmoqda. Aynan o‘sha mavsumdan boshlab nufuzli musobaqadagi ishtirokchilar soni 36 taga ko‘paytiriladi.

2021-yilda ham UEFA shu shu tizimni joriy etmoqchi ekani xabar qilingandi.

Eslatib o‘tamiz, koronavirus pandemiyasi sabab Chempionlar Ligasining 2019/20-yilgi mavsumining yakuniy qismi mazkur formatda o‘tkazilgandi.