O‘zbekistonlik maktab o‘quvchilariga Moskva fizika-texnika institutining sirtqi maktablarida o‘qish imkoni berildi

Moskva fizika-texnika instituti (MFTI) O‘zbekistondagi maktab o‘quvchilari uchun sirtqi fizika-texnika maktabining masofaviy ta’lim dasturlariga kirish imkoniyatini ochadi. Bu haqda Rossiya oliy ta’lim vazirligi xabar berdi.

Loyiha O‘zbekistondagi ta’lim muassasalarida matematika, fizika, kimyo va informatika fanlari bo‘yicha kadrlar tayyorlashga qaratilgan.

MFTI sirtqi fizika-texnika maktabi yarim asr davomida matematika, fizika, yaqinda esa kimyo va informatika bo‘yicha talabalarni muvaffaqiyatli tayyorlab kelmoqda. Masofaviy texnologiyalarning rivojlanishi maktab o‘quv dasturlarini onlayn formatga o‘tkazish imkonini berdi. Bu esa butun dunyodan rusiyzabon talabalarga o‘qituvchilarining noyob pedagogik texnologiyalaridan foydalanish uchun yo‘l ochib berdi.

O‘zbekistonning o‘rta maktab o‘quvchilari joriy o‘quv yilida ta’lim dasturlarini o‘zlashtirishni boshlashlari mumkin. Bundan tashqari, bitiruvchi sinf o‘quvchilari xalqaro maktab olimpiadalarida qatnashib, institutga kirish uchun imtiyozlarga ega bo‘lishlari mumkin.

MFTI o‘quv ishlari bo‘yicha prorektori Artem Voronov mazkur loyiha, birinchi navbatda, ilm-fan rivojiga va iqtidorli bolalarni ilmiy-tadqiqot ishlariga jalb etishga qo‘shilayotgan hissa sifatida baholanishini ta’kidladi.

Uning fikricha, dunyoning eng yaxshi universitetlarida o‘z ilmiy yo‘nalishini davom ettirmoqchi bo‘lganlar uchun bu loyiha ijtimoiy lift vazifasini o‘tashi mumkin.

O‘zbekiston ushbu ta’lim loyihasi uchun tajriba sifatida tasodifan tanlanmagan: biz respublikaning kuchli maktablari bilan uzoq vaqtdan beri yaqin aloqadamiz. Shu tufayli bizning sa’y-harakatlarimiz aniq va tabiiy fanlarni o‘qitishning umumiy darajasiga, umuman, davlatlararo hamkorlikka foydali ta’sir ko‘rsatishiga ishonchimiz komil, — deya qo‘shimcha qildi Artem Voronov.

Dasturda kirish test sinovlaridan muvaffaqiyatli o‘tgan O‘zbekiston fuqarolari ishtirok etishlari mumkin bo‘ladi.

Avvalroq AQSH harbiy mahsulotlarni ishlab chiqarish bilan shug‘ullangan Moskva fizika-texnika institutiga qarshi sanksiya kiritgani haqida xabar qilingan edi.