“Milan” klubi bahraynliklar qo‘liga o‘tishi mumkin

Bahraynning Investcorp investitsion kompaniyasi “Milan” futbol klubini sotib olishi mumkin, deya xabar qilmoqda Reuters.

Osiyo kompaniyasi milanliklar klubiga egalik qiladigan Elliott Management bilan muzokara olib bormoqda. Qayd etilishicha, loyiha 1 milliard yevroga baholanyapti.

Investcorp xususiy investitsiya, ko‘chmas mulk hamda kredit va strategik kapital boshqaruvi bilan shug‘ullanadi. Mazkur kompaniya umumiy miqdorda 42 milliard dollarlik aktivlarni boshqaradi.

Agar muzokaralar muvaffaqiyatli yakunlansa, tarixda ilk bor A Seriya klubida Yaqin sharqdan bo‘lgan xo‘jayin paydo bo‘ladi.

Avvalroq Angliyaning “Nyukasl” klubiga egalik qiladigan Saudiya Arabistoni fondi “Inter”ni sotib olish istagida ekani xabar qilingandi.