Shavkat Mirziyoyev 15-aprel kuni o‘tkazilgan videoselektor yig‘ilishida eksportchi korxonalarni qo‘llab-quvvatlash choralari kuchaytirilishini aytdi. Bu haqda prezident matbuot kotibi xabar qildi.
Qayd etilishicha, o‘tkazilgan uchrashuvlarda QQSni qaytarishda muammolar borligi aniqlangan. Shu munosabat bilan ularga QQSni qaytarish bo‘yicha soddalashtirilgan mexanizm joriy etilib, 80 foiz mablag‘ qo‘shimcha tekshiruvlarsiz 7 kun ichida qaytarib beriladi.
Bundan tashqari, eksportchilarning masalalarini doimiy o‘rganib, ularni tezkorlik bilan hal qilish bo‘yicha uzluksiz va doimiy ishlovchi shtab tuziladi, 1094 raqamli Call-markaz tashkil etiladi.
Prezident yer uchastkalarini auksionga chiqarish muammosiga to‘xtalgan. 35 mingta yer uchastkasi elektron tizimga kiritilgani bilan, bugungi kunga qadar Navoiy, Sirdaryo, Toshkent viloyatlari va Toshkent shahrida birorta yer uchastkasi auksionga chiqarilmagani ko‘rsatib o‘tilgan.
Hokimliklar, qurilish va arxitektura idoralari masalaga yuzaki qarayotgani ta’kidlangan. “Necha marta bu masala sizlarga tushuntirildi. Tadbirkorlardan talab katta, lekin amalda hali natija yo‘q”, — deya tanqid qilgan davlat rahbari.
Izoh (0)