So‘nggi 3 yil ichida umumiy quvvati 8 905 MVtga teng bo‘lgan issiqlik, quyosh va shamol elektr stansiyalarini qurish bo‘yicha xalqaro kompaniyalar bilan hamkorlikda 19 ta bitim imzolandi. Bu haqda 15-aprel kuni AOKAda bo‘lib o‘tgan brifingda Energetika vazirligi axborot xizmati rahbari Elmira Bekmurodova ma’lum qildi.
Ta’kidlanishicha, ushbu loyihalarning umumiy qiymati 6 milliard 919 million dollarni tashkil etib, ularning barchasi xorijiy kompaniyalar tomonidan to‘g‘ridan to‘g‘ri investitsiyalar hisobiga amalga oshiriladi.
Qayd etilishicha, 2022-yilning aprel oyida Samarqand viloyatining Nurobod tumanida 100 MVt quvvatli ikkinchi quyosh fotoelektr stansiyasi ishga tushiriladi.
Shuningdek, 2023-yil yakuniga qadar umumiy quvvati 1 197 MVt bo‘lgan 5 ta, xususan, Qoraqalpog‘iston Respublikasining Qorao‘zak tumanida quvvati 100 MVt bo‘lgan shamol elektr stansiyasi, Surxondaryo viloyatining Sherobod tumanida quvvati 457 MVt, Jizzax viloyatining G‘allaorol tumanida quvvati 220 MVt, Samarqand viloyatining Kattaqo‘rg‘on tumanida quvvati 220 MVt va Navoiy viloyatining Nurota tumanida quvvati 200 MVt bo‘lgan quyosh fotoelektr stansiyalari ishga tushiriladi.
2024-yilda Buxoro viloyatining Peshku va G‘ijduvon tumanlarida har birining quvvati 500 MVtdan bo‘lgan ikkita (jami ming MVt) va Navoiy viloyatining Tomdi tumanida quvvati 500 MVt bo‘lgan shamol elektr stansiyalari ishga tushiriladi.
2022-yilning o‘tgan uch oyida uchta viloyatda umumiy quvvati 1 154 MVt bo‘lgan beshta yangi issiqlik elektr stansiyasi ishga tushirilgan. Shuningdek, dekabr oyiga qadar Sirdaryo viloyatining Xovos tumanida quvvati 220 MVt bo‘lgan yangi issiqlik elektr stansiyasi ishga tushiriladi.
Bundan tashqari, 2023-yil yakuniga qadar Sirdaryo viloyatining Shirin shahrida quvvati 1 500 MVt, 2024 yil yakuniga borib esa Surxondaryo viloyatining Angor tumanida quvvati 1 560 MVt bo‘lgan yangi issiqlik elektr stansiyalari ishga tushiriladi.
Mazkur ishlar natijasida 2026 yilga borib O‘zbekistonda umumiy quvvati 8 ming MVtga teng bo‘lgan quyosh va shamol elektr stansiyalari, 868 MVt quvvatga ega gidroelektr stansiyalari hamda 6 008 MVtga teng yangi issiqlik elektr stansiyalari ishga tushiriladi. Natijada O‘zbekistonda ishlab chiqarish quvvatlari 27 ming 400 MVtga yetkaziladi.
Mavzuga doir:
- O‘zbekistonda 2022-yilda 7 ta yangi elektr stansiyasi ishga tushiriladi
- Shavkat Mirziyoyev Qoraqalpog‘istonda shamol elektr stansiyasi qurilishiga tamal toshini qo‘ydi
- O‘zbekistonda uch oy ichida 3 ta yangi issiqlik elektr stansiyasi ishga tushirildi
- Shavkat Mirziyoyev Surxondaryodagi yangi issiqlik elektr stansiyasi qurilishiga start berdi
Izoh (0)