Toshkent metropoliteni 15-apreldan boshlab bundan yarim yil oldin bekor qilingan jetonlarni aholidan sotib olishni boshlaydi. Bu haqda metropoliten matbuot xizmati xabar berdi.
2020-yilning noyabridan boshlab Toshkent metropolitenida yo‘lovchilar uchun jetonlarni sotish to‘xtatilib, avtomatlashtirilgan to‘lov tizimi joriy etilgan edi. 2021-yilning 1-dekabridan boshlab Toshkent metropolitenida yo‘l haqini to‘lash uchun jetonlarni qabul qilish to‘xtatilgan. Barcha bekatlar QR kodli bilet, transport va bank kartalari hamda NFC orqali to‘lovlarni amalga oshirish imkonini beruvchi statsionar validatorlar bilan jihozlangan.
Ma’lum qilinishicha, aholidagi mavjud jetonlar 2022-yilning 15-aprel sanasidan boshlab amaldagi yo‘l haqi asosida “Toshkent metropoliteni” DUK ma’muriyati tomonidan xarid qilinadi.
Mazkur ma’muriyat binosi Islom Karimov ko‘chasi, 16a uyda joylashgan. Ish vaqti: dushanbadan jumaga qadar, soat 09:00 dan 16:00 gacha.
Izoh (0)