Buyuk Britaniya bosh vaziri Boris Jonson va moliya vaziri Rishi Sunak koronavirus cheklovlarini buzgani uchun jarimaga tortildi, deb xabar beradi Reuters.
Britaniya bosh vaziri, uning rafiqasi va g‘aznachilik kansleri 2020-yilgi lokdaun vaqtida hukumat muassasasidagi bazmda ishtirok etib, karantin qoidalarini buzgani uchun jarima belgilangani to‘g‘risida xabardor qilingan. Natijada Jonson qonunni buzgani uchun sanksiyaga uchragan birinchi amaldagi Britaniya bosh vaziriga aylandi.
Ularning uchalasi ham kechirim so‘ragan, biroq bosh vazir Jonson va kansler Sunak muxolif siyosatchilarning iste’fo berish to‘g‘risidagi chaqiriqlarini rad etgan.
“Bosh vazir va g‘aznachilik kansleri bugun poytaxt politsiyasining ularga jarima belgilangani to‘g‘risidagi xabarnomasini oldi. Batafsil ma’lumotlar yo‘q, ammo ular paydo bo‘lishi bilan sizlarga ma’lum qilamiz”, — deydi Jonsonning vakili.
Jarimalar London politsiyasi tomonidan karantin vaqtida Dauning-strit va boshqa hukumat binolarida o‘tkazilgan 12 ta tadbir bo‘yicha o‘tkazilayotgan tergov doirasida belgilangan. Tergov yakunlari bo‘yicha 50 dan ortiq jarima yozilgan.
Ta’kidlash kerakki, Britaniya siyosiy elitasi koronavirus pandemiyasi vaqtida bir Partygate nomini olgan bir nechta bazmlarda ishtirok etgan. Politsiya ma’lumotlariga ko‘ra, Jonson bu kabi tadbirlarning kamida oltitasida qatnashgan.
Eslatib o‘tamiz, bundan oldin niqob taqmagan Braziliya prezidenti, niqobni noto‘g‘ri taqqan Chexiya sobiq prezidenti, majlisda tibbiy niqobsiz qatnashgan Tailand bosh vaziri jarimaga tortilgan edi.
Izoh (0)