“Qizilqum” bosh direktori lavozimida ishlab kelgan Hamidjon Aktamov 18-mart kuni o‘z arizasiga ko‘ra ishdan ketgan, deya ma’lum qilmoqda PFL. Klub bu haqida PFLga ma’lumot bermagani uchun jazoga tortiladi.
“Qizilqum” Aktamovning ketganini oradan 18 kun o‘tib — 5-aprel sanasida ma’lum qilgan. PFL bunga munosabat bildirdi.
“2022-yilgi mavsumda O‘zbekiston Professional futbol ligasi tomonidan o‘tkaziladigan musobaqalar reglamenti”ning 8.4-bandida klub o‘z rasmiysi bilan tuzilgan mehnat shartnomasini bekor qilsa, PFL uch kun ichida bu haqda yozma ravishda ogohlantirilishi hamda ozod etilgan shaxs litsenziyasi PFLga topshirilishi lozim ekani ko‘rsatilgan. Shuningdek, “Litsenziyalash reglamenti”ning P.14 mezoni 3-bandida shunday yozilgan: “Litsenziya talabgori lavozimning bo‘shab qolganligi va ushbu lavozimda yangi mutaxassis ish boshlagani to‘g‘risida ko‘pi bilan yetti ish kuni ichida PFLni xabardor qilishi zarur”.Ma’lumot uchun, “Qizilqum” futbol klubi PFLga taqdim etgan xatida Hamidjon Aktamovning sport ishlari bo‘yicha o‘rinbosari Alisher Xoliqov direktor vazifasini bajarayotganini qayd etgan.Shunga qaramay, “Qizilqum” na o‘z rasmiy sahifalarida va na xat orqali bu haqda rasmiy ma’lumot taqdim etdi. Shundan kelib chiqib, “Qizilqum” futbol klubi jarimaga tortiladi.
PFL rasmiy bayonoti
Hamidjon Aktamov 2017-yildan buyon “Qizilqum” bosh murabbiyi sifatida, 2022-yil yanvar oyidan boshlab direktor lavozimida faoliyat yuritib kelayotgan edi.
Izoh (0)