Ijtimoiy tarmoqlarda “Paxtakor” stadionida futbol tugaganidan so‘ng janjal yuzaga kelgani va muxlislar kaltaklangani aytilgan video tarqaldi. Toshkent shahar IIBB holatga munosabat bildirib, hozirda tekshiruv harakatlari olib borilayotganini ma’lum qildi.
Videoda aytilishicha, “Navbahor” muxlisining 2 ta tishi singan, tan jarohatlar olgan va tez yordamga murojaat qilgan.Tez yordam xodimi ham bemorni “Paxtakor” stadioni yonidan olganini tasdiqlagan.
Ma’lum qilinishicha, 1-aprel kuni soat 19:00 da poytaxtning “Paxtakor” stadionida O‘zbekiston chempionati musobaqasi doirasida Toshkentning “Paxtakor” va Namangan viloyatining “Navbahor” jamoalari o‘rtasida futbol uchrashuvi bo‘lib o‘tgan.
Uchrashuv yakunlanganidan so‘ng “Navbahor” va “Paxtakor” jamoalari futbolchilari o‘rtasida o‘zaro kelishmovchilik kelib chiqqan. Ushbu kelishmovchilik, xizmatga jalb qilingan huquqni muhofaza qiluvchi organ xodimlari tomonidan zudlik bilan bartaraf etilib, ommaviy tartibbuzarliklarning oldi olingan.
Hozirda holat yuzasidan Shayxontohur tumani IIO FMB tomonidan tekshiruv o‘tkazilmoqda.
Eslatib o‘tamiz, “Neftchi”—“Turon” uchrashuvi tugaganidan keyin “Neftchi” futbolchilari va muxlislar hakamlarga tashlangandi. Vaziyatlarning birida farg‘onaliklar o‘yinchisi uchrashuv bosh hakami Shavkat Nasibullayevga oyoq bilan zarba bergan. Keyinchalik hakamga zarba bergan futbolchi 98-raqamli Jamshid To‘raqulov ekani ma’lum bo‘lgandi.
Shundan so‘ng o‘yindan keyin yuzaga kelgan tartibsizliklarda ishtirok etgan besh nafar shaxsga nisbatan 15 sutka ma’muriy qamoq jazosi tayinlangani va olti kishiga nisbatan jinoyat ishi ochilgani, ular orasida ikki nafar “Neftchi” futbolchilari ham borligi haqida xabar berilgandi. 2021-yilning fevralida jinoyat ishlari bo‘yicha Farg‘ona shahar sudida “Neftchi”—“Turon” futbol o‘yinida kelib chiqqan janjal bo‘yicha jinoyat ishi ochiq sud majlisida ko‘rib tamomlangandi.
Izoh (0)