2022-yilning mart oyida aholining murojaatlariga asosan Uy-joy kommunal xizmat ko‘rsatish vazirligi huzuridagi Uy-joy fondi inspeksiyasi tomonidan respublikadagi ko‘p qavatli uy-joy fondlariga xizmat ko‘rsatuvchi shirkatlarning faoliyati o‘rganildi, deb xabar beradi vazirlik matbuot xizmati.
O‘rganishlar natijasida 23 ta uy-joy mulkdorlar shirkati tomonidan 36 ta holatda 1,7 millard so‘m mablag‘ maqsadsiz sarflangani yoki talon-toroj qilingani aniqlangan. Shundan 7 ta holatda qurilish-ta’mirlash ishlar hajmiga 327,1 million so‘m qo‘shib yozilgan. Bundan tashqari:
- 3 ta holatda 78,9 million so‘m kredit mablag‘i maqsadsiz sarflangan yoki talon-toroj qilingan;
- 21 ta holatda mulkdorlardan yig‘ilgan 1,2 milliard so‘m majburiy badal mablag‘i maqsadsiz ishlatilgan yoki talon-toroj qilingan;
- 5 ta holatda umumiy qiymati 99,7 million so‘m bo‘lgan boshqa huquqbuzarlik va kamchiliklarga yo‘l qo‘yilgan.
Avvalroq Sirdaryoda o‘zgalar nomiga 1,2 mlrd so‘m kredit rasmiylashtirgan sobiq bank xodimlariga jinoyat ishi ochilgani, Zangiotada 5,9 mlrd so‘m imtiyozli kredit mablag‘larini talon-toroj qilgan rahbarlar aniqlangani, Toshkentda o‘zi ishlaydigan korxonaning 160 mln so‘mdan ortiq mablag‘ini talon-toroj qilgan bosh hisobchi ushlangani to‘g‘risida xabar berilgandi.
Izoh (0)