Toshkent shahrida Ramazon oyi kechalaridagi tarovih namozi munosabati bilan har kuni 18:00 dan 00:00 ga qadar masjidlar yaqinidagi yo‘llar transport vositalari harakati uchun berkitiladi. Bu haqda shahar hokimligi axborot xizmati xabar qildi.

Qayd etilishicha, quyidagi hududlar avtomobillar harakati uchun yopiladi:

• Quddus Sharif masjidi bo‘yicha: Yangi Sergeli ko‘chasidan – Qipchoq ko‘chasi bo‘ylab, Nilufar ko‘chasigacha bo‘lgan qismi;
• Mirza Yusuf (Bodomzor) masjidi bo‘yicha: Bog‘ishamol ko‘chasidan Chingiz Aytmatov ko‘chasi bo‘ylab Qozi tarnov 2-tor ko‘chasigacha bo‘lgan qismi;
• Shayx Zayniddin masjidi bo‘yicha: Beshqayrag‘och ko‘chasidan Ko‘kcha darvoza ko‘chasi bo‘ylab, Nurafshon ko‘chasigacha bo‘lgan qismi;
• Novza masjidi bo‘yicha: Muqimiy ko‘chasidan Bunyodkor mahalliy yo‘li bo‘ylab, Seul ko‘chasigacha bo‘lgan qismi ;
• Islom ota masjidi bo‘yicha: Farg‘ona yo‘li 5-tor yo‘lidan Farg‘ona yo‘lining mahalliy yo‘li bo‘ylab, Olot ko‘chasigacha bo‘lgan qismi;
• Yunusobod Oqtepa masjid bo‘yicha: Amir Temur shohko‘chasidan Chinobod ko‘chasi bo‘ylab, Darvoza kent ko‘chasigacha bo‘lgan qismi;
• Fotimayi Zahro masjid bo‘yicha: Nurafshon ko‘chasidan Oqtepa Majlisiy ko‘chasi bo‘ylab, Katta Oq tepa ko‘chasigacha bo‘lgan qismi;
• Bo‘ta buva masjid bo‘yicha: Bunyodkor shohko‘chasidan Beshqo‘rg‘on ko‘chasi bo‘ylab, Beshqo‘rg‘on 4-tor ko‘chasigacha bo‘lgan qismi;
• Yakkasaroy masjidi: Shota Rustaveli ko‘chasidan Yakkasaroy ko‘chasi bo‘ylab, Bog‘ibo‘ston ko‘chasigacha bo‘lgan qismi;
• Usmon Bin Mahzun masjidi: Qushbegi ko‘chasidan KHAY bo‘ylab, Cho‘ponota ko‘chasigacha bo‘lgan qismi.

“Holatga qarab, namozxonlar soni ko‘payib ketgan taqdirda, masjidga tutashgan boshqa yo‘llar ham yopilishi mumkin.

Haydovchilardan berkitilgan ko‘chalarni oldindan chetlab o‘tishni iltimos qilamiz”, — deyiladi xabarda.

Eslatib o‘tamiz, O‘zbekistonda Ramazon oyi 2-apreldan boshlanadi. O‘zbekiston musulmonlari idorasining “Qur’on va tajvidni o‘rgatish” bo‘limi tomonidan 1443/2022-yil Ramazon oyida Toshkent shahri masjidlarida tarovih namozlarida o‘qiladigan xatmi Qur’onning kunlik taqsimoti belgilandi. Unga ko‘ra, xatmi Qur’on aprelning birinchi kunidan boshlab, 27 sana – Qadr kechasida yakunlanishi mo‘ljallanmoqda.

Avvalroq O‘zbekiston musulmonlari idorasida Ramazon oyini munosib kutib olish va islom dini tartib-qoidalari asosida oyni kuzatish bo‘yicha ishchi guruh tuzilgani, Qozog‘istonda 2022-yildagi Ramazon oyi 2-apreldan boshlanib, 2-mayga qadar davom etishi e’lon qilingani to‘g‘risida xabar berilgandi.