Uzbekistan Airways Isroilga haftasiga 4 martagacha to‘g‘ridan to‘g‘ri yangi reyslarni yo‘lga qo‘yishni rejalashtirmoqda. Bu haqda O‘rta Yer dengizi xalqaro turizm yarmarkasida kompaniya vakillari ma’lum qildi, deb xabar beradi Uzbekistan Travel.
Ko‘rgazma doirasida O‘zbekistonning Isroildagi elchixonasi bilan hamkorlikda O‘zbekiston va Isroil turistik kompaniyalari o‘rtasida B2B formatidagi uchrashuv bo‘lib o‘tgan. Uchrashuvda O‘zbekiston sayyohlik kompaniyalari mamlakat shaharlarida isroilliklar uchun mutlaqo yangi turistik yo‘nalishlarni taqdim etgan va sayohatlarni rejalashtirish sohasida mamlakatlar o‘rtasidagi aloqalarni rivojlantirishga oid masalalarni muhokama qilgan.
Uzbekistan Airways ma’lumotlariga ko‘ra, aviakompaniya Tel-Avivga haftasiga ikki marta muntazam reyslarni amalga oshiradi. Yangi reyslarning yo‘lga qo‘yilishi esa parvozlar chastotasini ikki barobarga oshirib, haftasiga to‘rt marotabaga yetkazadi.
Toshkent va Tel-Aviv o‘rtasidagi muntazam reyslar 2021-yilning mayidan qayta tiklangan. Mamlakatlar har hafta charter reyslarni yo‘lga qo‘yishni kelishib olgandi. Biroq iyulda reyslar yana bekor qilingandi — Isroil O‘zbekistonni koronavirus bilan kasallanish darajasi yuqori bo‘lgan davlatlar qatoriga qo‘shgan edi.
The International Mediterranean Tourism Market (IMTM) —Isroil turizm sanoati uchun professional ko‘rgazma va Sharqiy O‘rta Yer dengizidagi eng muhim va eng yirik turizm yarmarkasi. O‘rta Yer dengizi xalqaro turizm bozori-2022 yarmarkasida Ozarbayjon, Filippin, Braziliya, Gruziya, Ispaniya, Bolgariya, Portugaliya, Xorvatiya, Litva, Italiya, Polsha, Sloveniya, Gretsiya — jami 50 dan oshiq davlatlar ishtirok etmoqda.
Izoh (0)