Turkiya prezidenti Rajab Toyyib Erdo‘g‘onning O‘zbekistonga tashrifi doirasida 29-mart kuni Toshkent viloyatida zamonaviy issiqlik elektr stansiyasini ishga tushirish hamda Sirdaryo viloyatida shunday stansiya qurilishini boshlash marosimi bo‘ldi. Ushbu loyihalar Turkiyaning Cengiz Enerji kompaniyasi tomonidan amalga oshirilmoqda. Bu haqda Prezident matbuot xizmati xabar qildi.
Qayd etilishicha, Shavkat Mirziyoyev marosimda nutq so‘zlab, loyihalarning ahamiyatiga to‘xtalgan. Ushbu majmualar O‘zbekiston va Turkiya o‘rtasidagi iqtisodiy hamkorlik samaralarining yorqin ifodasi ekanini ta’kidlagan. Oxirgi bir yilning o‘zida Turkiya kompaniyalari bilan birgalikda O‘zbekistonning jadal rivojlanayotgan iqtisodiyoti uchun juda muhim bo‘lgan 5 ta yirik energetika loyihalari amalga oshilgani alohida qayd etilgan. Xususan, ushbu stansiyalarning umumiy quvvati bugungi loyihalar bilan qo‘shib hisoblaganda 1,4 ming megavattga yetadi.
O‘zbekiston energetika tarmog‘ini modernizatsiya qilish natijasida 2026-yilgacha davlat-xususiy sheriklik asosida umumiy qiymati 12 milliard dollarlik 29 ta loyiha ishga tushirilishi ta’kidlangan. Ular qo‘shimcha 71 milliard kilovatt-soat elektr energiyasi ishlab chiqarish imkonini yaratadi, yiliga 12 milliard kub metr tabiiy gaz tejaladi.
O‘zbekiston rahbari elektr stansiyasini bunyod etishda qatnashgan muhandis va quruvchilarga minnatdorlik bildirgan. So‘ng Shavkat Mirziyoyev va Erdo‘g‘on ramziy tugmani bosib, Qibray tumanidagi issiqlik elektr stansiyasini ishga tushirgan va Xovos tumanidagi issiqlik elektr stansiyasi qurilishini boshlab bergan.
Qibraydagi IES quvvati 240 megavatt bo‘lib, yiliga 2 milliard kilovatt-soat energiya ishlab chiqaradi. Xovos tumanidagi yangi issiqlik elektr stansiyasi 220 megavatt quvvatga ega, unda yiliga 1 milliard 700 million kilovatt-soat elektr energiyasi ishlab chiqariladi.
Eslatib o‘tamiz, Shavkat Mirziyoyevning taklifiga binoan Turkiya prezidenti Rajab Toyyib Erdo‘g‘on 29—30-mart kunlari rasmiy tashrif bilan O‘zbekistonda bo‘lishi xabar qilingandi. 29-mart kuni Ko‘ksaroy qarorgohida Erdo‘g‘onni rasmiy kutib olish marosimi bo‘lib o‘tdi.
So‘ng ikki mamlakat yetakchilari ishtirokida O‘zbekiston—Turkiya strategik sheriklik kengashining ikkinchi yig‘ilishi bo‘lib o‘tdi. Shavkat Mirziyoyev muloqot avvalida Turkiya yetakchisi va xalqini Navro‘z bayrami bilan tabriklab, “yetakchi turk kompaniyalar bilan aniq loyihalar sonini ko‘paytirish niyatida” ekanini aytib o‘tdi.
Shuningdek, Shavkat Mirziyoyev ta’lim sohasida hamkorlik davom ettirilib, mamlakatda yangi universitetlar ish boshlashini aytib o‘tgan. “O‘tgan yili Anqara va Istanbul shaharlarida O‘zbekiston madaniyat kunlari muvaffaqiyatli o‘tkazildi. Joriy yilda Toshkent va Samarqand shaharlarida Turkiya madaniyat kunlarini o‘tkazishni taklif qilaman”, — deydi O‘zbekiston prezidenti.
Yig‘ilishda Turkiya prezidenti Shavkat Mirziyoyev amalga oshirayotgan islohotlarni yuksak baholab, “olti yildan buyon qardoshim qat’iylik bilan amalga oshirayotgan islohotlarni yuksak baholaymiz. Bundan keyin ham Turkiya O‘zbekistonning strategik hamrohi sifatida qoladi”, — dedi.
Izoh (0)