“Barselona” bosh murabbiyi Xavi kataloniyaliklarning Paulo Dibala bilan shartnoma imzolashiga rozi bo‘lmadi.
Argentinalik futbolchining “Yuventus” bilan shartnomasi 2022-yilning yozida o‘z nihoyasiga yetadi va u Ispaniyada o‘zini sinab ko‘rmoqchi, deya xabar beradi El Nacional.
“Real” Dibalaga qiziqish bildirgani yo‘q. “Barselona” esa futbolchi bilan shartnoma imzolash variantini ko‘rib chiqdi. “Ko‘k-anorranglilar” prezidenti Xoan Laporta ham Pauloning erkin agent sifatida jamoa safiga qo‘shilishiga qarshi emas.
Ammo katalonlar ustozi Xavi argentinalik bilan shartnoma imzolanishiga qarshi chiqqan, mutaxassis Dibalani “ortiqcha baho berib yuborilgan” o‘yinchi ekanini qayd etgan.
Avvalroq, hujumchining agenti va klub rahbariyati o‘rtasida uchrashuvdan so‘ng, tomonlar yangi shartnoma borasida kelisha olmagani va Dibalaning “Yuventus”ni tark etishi aniq bo‘lgani xabar qilingandi. “Liverpul” va “Manchester Siti”ning Pauloni tekinga qo‘lga kiritmoqchi ekanligi to‘g‘risida xabarlar yangragandi.
Ma’lumot uchun, Dibala 2015-yilning yozida “Palermo”dan 41 million yevro evaziga turinliklar safiga o‘tgan. 2021/22-yilgi mavsumda u Italiya A Seriyasida 21 o‘yin o‘tkazib, 8 ta gol va 5 ta golli uzatmaga mualliflik qildi. Bundan tashqari Chempionlar Ligasida ham o‘z nomiga 3 ta gol va bitta golli uzatma yozdirib qo‘ygan.
Izoh (0)