Toshkent xalqaro investitsiya forumi doirasida O‘zbekiston Sog‘liqni saqlash vazirligi va Saudiya Arabistonining HMG kompaniyasi o‘rtasida o‘zaro anglashuv to‘g‘risida Memorandumni imzolash marosimi bo‘lib o‘tdi. Bu haqda Investitsiyalar va tashqi savdo vazirligi xabar qildi.
HMG (Dr.Sulaiman al-Habib Medical Group) Yaqin Sharqning xususiy sektorida tibbiyot xizmatlarining ilg‘or yetkazib beruvchilaridan biri hisoblanadi. Saudiya Arabistoni Podshohligi, Birlashgan Arab Amirliklari va Bahrayn podshohligining 18 ta tibbiyot muassasasi kompaniya boshqaruvi ostida hisoblanadi.
Hujjatga muvofiq, O‘zbekiston sog‘liqni saqlash tizimiga tibbiy ma’lumotlarni raqamlashtirish va markazlashtirish, shuningdek, bemorlar bilan o‘zaro muloqot jarayonlarini takomillashtirish maqsadida zamonaviy texnologiyalar, jumladan, Toshkentning yirik tibbiy muassasalaridan birini HMG yetkazib beradigan IT-yechimlarga ulash bo‘yicha sinov dasturi joriy qilinadi.
Shuningdek, O‘zbekistonda o‘zbek tibbiyot xodimlarini o‘qitish va malakasini oshirish maqsadida HMG tibbiyot akademiyasi tashkil etiladi. Bundan tashqari, har yili kichik tibbiyot xodimlaridan kamida 10 ta xodim malakasini oshirish maqsadida Saudiya Arabistonidagi HMG kasalxonalariga yuboriladi.
Hujjatda Toshkentda HMG’ning ilg‘or va zamonaviy texnologiyalar bilan jihozlangan shifoxona va kasalxonalarining standartlariga muvofiq bo‘lgan zamonaviy ko‘p tarmoqli tibbiy kompleksini yaratish bo‘yicha yangi investitsiya loyihasini amalga oshirish to‘g‘risida ham so‘z boradi.
Memorandumni imzolash marosimi investitsiyalar va tashqi savdo vaziri Sardor Umurzoqov hamda Saudiya Arabistoni podshohligi investitsiyalar vaziri Xolid al-Falih ishtirokida bo‘lib o‘tgan. Hujjat ostiga O‘zbekiston sog‘liqni saqlash vaziri Behzod Musayev, Investitsiyalar va tashqi savdo vazirligi huzuridagi to‘g‘ridan to‘g‘ri investitsiyalar jamg‘armasi bosh direktori Otabek Nazirov va HMG’ning bosh amaliyotchi direktori doktor Abdulvahob al-Abdulvahob o‘z imzosini qo‘ygan.
Eslatib o‘tamiz, 18-mart kuni Toshkentdagi “O‘zbekiston” xalqaro anjumanlar saroyida Shavkat Mirziyoyevning sog‘liqni saqlash sohasi vakillari bilan “O‘zbekiston tibbiyoti — inson qadri uchun” mavzusidagi ochiq muloqoti bo‘lib o‘tdi. Prezident ochiq muloqotga tayyorgarlik jarayonida kelib tushgan muammolarning yechimlari va bugungi takliflar bo‘yicha qisqa muddatda qarorlar qabul qilinishini ta’kidlagandi.
Muloqot davomida sog‘liqni saqlash tizimida islohotlar davom ettirilishi qayd etildi. Davlat rahbari hozirda sohada transformatsiya jarayoni ketayotganini aytdi. Xususan, O‘zbekistonda 1-apreldan boshlab chet eldan olib kiriladigan tibbiy jihozlar QQS va bojxona bojidan ozod qilinishi va tez tibbiy yordam tizimidagi barcha Damas’lar 2025-yilgacha zamonaviy avtomobillarga almashtirilishi ta’kidlandi. Bundan tashqari, O‘zbekistonda tibbiyot xodimlarining oylik maoshi kamida 10 foizga oshirilishi, tibbiyot oliygohlari talabalariga shifokor bo‘lib ishlashga ruxsat berilishi ma’lum qilindi.
Izoh (0)