Erling Holand “Manchester Siti”ning qariyb 30 millionlik shartnomasini rad etdi. Hujumchi “Real” taklifini kutmoqda

“Manchester Siti” va “Real” Erling Holand uchun kurash olib bormoqda.

As xabariga ko‘ra, o‘tgan haftada “Borussiya D” hujumchisi “Manchester Siti”ning haftasiga 600 ming yevrolik birinchi taklifini rad etgan. Unga ko‘ra, futbolchi yiliga 27—28 million yevro ishlab topardi.

Norvegiyalik futbolchining “Real”dan taklif kutayotgani aytilmoqda. Holandning qarori faqat moliyaviy jihatga bog‘liq bo‘lmaydi. Agar hammasi pulga bog‘liq bo‘lganida, uning “Manchester Siti” bilan shartnoma imzolash ehtimoli yuqoriligi aytilmoqda.

“Real” ham Holand uchun asosiy da’vogar bo‘lib turibdi, “qirollik klubi”ni masalaning moddiy tomoni o‘ylantirmoqda.

Bundan tashqari, “PSJ” va “Barselona” ham Holandga asosiy da’vogarlar sifatida tilga olinib kelinmoqda. Uning “Borusiya” bilan amaldagi shartnomasi 2024-yilning yozida o‘z nihoyasiga yetadi.

21 yoshli hujumchi 2021/22-yilgi mavsumda Dortmund klubi safida 23 o‘yinda maydonga tushib, 23 ta gol urdi va 5 ta golli uzatmani amalga oshirdi.