Turkmanistonning yangi saylangan prezidenti Serdar Berdimuhamedov hukumat iste’fosi haqidagi farmonni imzoladi. Bu haqda “RBK” nashri xabar bermoqda.
Hukumatning istefoga chiqishi Turkmaniston konstitutsiyasiga muvofiq amalga oshirildi. Vazirlar yangi hukumat tuzilgunga qadar o‘z vazifalarini bajarishda davom etadi.
Eslatib o‘tamiz, Turkmaniston prezidenti sifatida 2007-yildan buyon ishlab kelgan Gurbanguli Berdimuhamedov 11-fevral kuni hukumatni yosh avlodga topshirishga qaror qilganini, o‘zi esa parlament yuqori palatasi raisi bo‘lib qolishini ma’lum qilgandi.
Oradan bir oy o‘tib, 12-mart kuni mamlakatda prezidentlik saylovlari bo‘lib o‘tdi. Unda amaldagi davlat rahbarining o‘g‘li Serdar Berdimuhamedov g‘olib bo‘ldi. Saylov kampaniyasi davomida u Turkmanistonning neytral maqomini saqlab qolish, shuningdek, yaxshi qo‘shnichilik munosabatlarini rivojlantirish va xalqaro tashkilotlar, xususan, BMT bilan hamkorlikni mustahkamlashga va’da bergan.
Ovoz berish natijalariga ko‘ra, u 72,97 foiz ovoz olgan. Uni saylovdagi g‘alabasi bilan bir qancha davlat rahbarlari, jumladan, O‘zbekiston prezidenti Shavkat Mirziyoyev tabrikladi. 19-mart kuni yangi saylangan prezidentning inauguratsiya marosimi bo‘lib o‘tdi.
Izoh (0)