Jonson boshqa davlatlardan Putin bilan munosabatlarni yaxshilamaslikni so‘radi

Mamlakatlar Rossiya prezidenti Vladimir Putinga nisbatan “real siyosat”ni olib bormasligi va munosabatlarni qayta tiklashga urinmasligi zarur. Bu haqda Buyuk Britaniya bosh vaziri Boris Jonson Konservativ partiyaning qurultoyida ma’lum qildi, deb yozmoqda The Guardian.

“Dunyoda zulmkor kuchlar bilan murosa qilishga urinmagan ma’qul. Men ular qattiq adashyapti deb hisoblayman”, — degan Jonson.

Uning so‘zlariga ko‘ram, Putin bilan munosabatlarni 2014-yilda Qrim bilan bog‘liq voqealardan keyin bo‘lgani kabi me’yorga keltirish endi qiyin kechadi.

Bundan tashqari, Jonson Rossiya Ukrainadagi maxsus operatsiyani muvaffaqiyatli yakunlasa, dunyoni, xususan, Boltiqdan Qora dengizgacha hududlarda “yangi tahdidlar davri” boshlanishini ta’kidladi. Mazkur ssenariyda Gruziya va Moldova mustaqilligi, shuningdek Sharqiy Yevropa xavf ostida qolib ketadi.

“Bu dunyo uchun burilish nuqtasi bo‘ladi. Ozodlik va istibdod o‘rtasidagi tanlov vaqti keladi”, — deya qo‘shimcha qilgan siyosatchi.

Jonson partiya majlisida ukrainaliklarga hamdardlik bildirdi va Putin maxsus harbiy operatsiyani boshlab “falokatli xatoga yo‘l qo‘yganini” qayd etdi.

Rossiya 24-fevralda Ukrainada maxsus harbiy operatsiyalar boshlaganini e’lon qilgan. Kiyev mamlakatda favqulodda harbiy holat e’lon qildi va Moskva bilan diplomatik munosabatlarni uzdi. Tomonlar fevral oxiri mart boshidan buyon nizoni hal etish yuzasidan muzokaralar olib bormoqda.

18-martda Rossiya delegatsiyasi rahbari Vladimir Medinskiy Moskva hamda Kiyev Ukrainaga betaraflik maqomini berish, uning NATO’ga a’zo bo‘lmasligi kafolatlari va boshqa asosiy muammoli masalalar bo‘yicha maksimal darajada murosaga yaqinligi, Kiyevning xavfsizlik kafolatlari muzokaralardagi og‘ir masalalardan biri ekanini bildirgan.

Ukraina delegatsiyasi a’zosi Mixail Podolyak 19-mart kuni muzokaralarning yana bir necha hafta davom etishi mumkinligi va huquqiy masalalarni hal etishga undan-da ko‘proq vaqt ketishi haqida gapirgan.

Putin 18-mart kuni Qrimning Rossiya tarkibiga qo‘shilganini nishonlash uchun tashkillashtirilgan konsertda yarimorol boshqa davlat ixtiyorida qoldiq mablag‘lar hisobidan moliyalashtirilishi oqibatida ahvoli og‘ir bo‘lgani va uni ushbu holatdan olib chiqilganini ta’kidlagan.

Putinning aytishicha Qrim aholisi Rossiya foydasiga qaror qabul qilib, neonatsistlar va ashaddiy millatchilarning yo‘liga to‘siq qo‘ygan. Rossiya prezidenti Donetsk va Luganskdagi odamlar ham Kiyevdagi siyosatdan qoniqmagani va oqibatda harbiy harakatlar boshlanib ketganini aytgan. Putin Donbassdagi harbiy operatsiyaning asosiy maqsadi aholini genotsid va azob-uqubatlardan qutqarish ekanligini takrorlab o‘tgan.