O‘zbekiston prezidenti Shavkat Mirziyoyev 14-mart kuni Germaniya prezidenti Frank-Valter Shtaynmayer bilan telefon orqali muloqot qildi. Bu haqda davlat rahbarining matbuot xizmati xabar berdi.
Ma’lum qilinishicha, muloqot davomida O‘zbekiston va Germaniya o‘rtasidagi ko‘p qirrali munosabatlarni yanada mustahkamlash va o‘zaro manfaatli hamkorlikni kengaytirish masalalari ko‘rib chiqilgan.
Suhbat avvalida davlat rahbarlari ikki mamlakat o‘rtasidagi diplomatik munosabatlar o‘rnatilganining 30 yilligi munosabati bilan bir-birini tabriklab, samimiy tilaklarini bildirgan.
Ushbu tarixiy davrda ikki tomonlama aloqalarni rivojlantirish borasida birgalikda katta ishlar qilingani, o‘zaro ishonch va sheriklik uchun mustahkam poydevor yaratilgani katta mamnuniyat bilan qayd etilgan.
Yetakchilar O‘zbekiston va Germaniya o‘rtasidagi amaliy hamkorlik holati va istiqbollarini ham muhokama qilgan, turli darajalarda muntazam siyosiy muloqot va faol aloqalarni davom ettirish muhim ekanini ta’kidlagan.
Germaniyaning yetakchi kompaniya va banklari bilan savdo, investitsiyalar, yuqori texnologiyalar, sanoat, qishloq xo‘jaligi va boshqa sohalarda qo‘shma kooperatsiya loyihalarini ilgari surishga alohida e’tibor qaratilgan.
Moliyaviy-texnik ko‘makni hamda madaniy-gumanitar almashinuvlarni, eng avvalo, O‘zbekistonda nemis tilini chuqurlashtirilgan o‘qitish sohasida kengaytirish muhimligi qayd etilgan.
“Prezidentlar xalqaro kun tartibining dolzarb masalalari, shu jumladan, Ukraina atrofida yuzaga kelayotgan vaziyat yuzasidan fikr almashdilar. Vaziyatning yanada keskin tus olishiga yo‘l qo‘ymaslik va mojaroni tez fursatda tartibga solish uchun siyosiy-diplomatik sa’y-harakatlarni davom ettirish zarurligi ta’kidlandi”, — deyiladi xabarda.
Avvalroq Shavkat Mirziyoyev Qosim-Jo‘mart To‘qayev bilan xalqaro kun tartibidagi masalalar bo‘yicha fikr almashgani to‘g‘risida xabar berilgandi.
Izoh (0)