“PSJ” hujumchisi Lionel Messi Parijdagi holatidan norozi va u “Barselona”ga qaytishi mumkin.

Argentinalik futbolchining otasi Xorxe Messi bir necha kun oldin kataloniyaliklar rahbariyati bilan aloqaga chiqqan. Jurnalist Adrien Grenyening xabar qilishicha, suhbatda Messining Ispaniyaga qaytish masalasi ko‘tarilgan.

Lionel 2000-yildan 2021-yilga qadar “ko‘k-anorranglilar” tizimida faoliyat yuritgan. 2021-yilning yozida erkin agent maqomida “PSJ” safiga borib qo‘shilgandi.

Parijliklar Chempionlar Ligasi 1/8 finalida “Real”ga imkoniyatni boy berib, musobaqani tark etgandi. Shundan so‘ng 34 yoshli futbolchi Parijni tark etishi haqida xabarlar tarqaldi. Argentinalikni mavsum boshidan beri fransuz OAV tinmay tanqid qilmoqda, “PSJ”ning Liga 1 doirasidagi so‘nggi o‘yinida esa parijlik muxlislar Leoni haqorat so‘zlar bilan “siylagan”.

Messi 2021/22-yilgi mavsum Parij jamoasi safida barcha musobaqalarda 26 ta o‘yinda ishtirok etib, 7 ta gol va 11 ta golli uzatma muallifiga aylandi.