Qamchiq dovonidagi ikki tunnel orasida joylashgan hududda bir kecha-kunduzda juda ko‘p yog‘ingarchilikdan hosil bo‘lgan suv oqimi avtomobil yo‘lining ostki qismini o‘pirib tushdi. Bu haqda Telegram’dagi “Gidrometeorologik ilmiy tahlillar, ob-havo prognozlari, tadqiqotlar, ma’ruzalar” kanalida ma’lum qilindi.
“Avtomobil yo‘li mashina qatnovi uchun xavfli holatga kelgan ko‘rinadi. Xavf dovonda maxsus tashkilotlar tomonidan bartaraf etilmoqda”, — deb yozadi kanal muallifi.
Ma’lumot uchun, Qamchiq dovonida 11-marta kuni kunduzi va kechasi bir sutka davomida umumiy 75 millimetr yog‘in yog‘gan. Solishtirish uchun bu yog‘in miqdori Qoraqalpog‘istonning ko‘plab stansiyalarida bir yilda yog‘adi.
Eslatib o‘tamiz, O‘zbekiston hududiga 10—16-mart kunlari Erondan iliq va nam havo, so‘ngra Kavkaz hududlaridan nisbatan salqin havo massasi kirib kelishi kutilmoqda. 11—16-martda respublika hududining katta qismida vaqti-vaqti bilan yomg‘ir yog‘adi, momaqaldiroq bo‘lishi mumkin. Shuningdek, 11—13-mart kunlari A-373 Toshkent—O‘sh avtoyo‘lining Qamchiq dovoni hududida vaqti-vaqti bilan kuchli yog‘ingarchilik, tuman kuzatilishi, ko‘rinuvchanlik 50 metrgacha pasayishi, shamol tezligi 20—23 m/s gacha kuchayishi, avtoyo‘lda qor uyumlari yuzaga kelishi mumkin.
“O‘zgidromet” 11—15-mart kunlari kutilayotgan kuchli yomg‘irlar yog‘ishi sababli respublikaning tog‘oldi va tog‘li hududlarida sel xavfidan ogohlantirdi. Respublikaning tog‘oldi va tog‘li hududlarida sel xavfi mart oyi boshidan buyon saqlanib qolmoqda. “O‘zgidromet” beqaror ob-havo ish haftasining oxirigacha saqlanib turishini prognoz qilgan. 12-mart kuni soat 09:00 dan Qamchiq dovoni qor ko‘chishi xavfi sabab yopilgan.
Izoh (0)