Toshkent shahri Shayxontohur tumanidagi “Malika” savdo majmuasi oldida 2021-yil 12-sentabr kuni bir nechta telefon sotuvchi fuqarolar o‘rtasida janjal, pichoqbozlik yuzaga kelgani, oqibatda 44 yoshli kishi vafot etgani xabar qilingandi. Toshkent shahar sudlari aybdorga nisbatan sud hukmi o‘qilganini ma’lum qildi.

Qayd etilishicha, ayblanuvchi bundan oldin ham bir necha marta sudlangan. So‘nggi bor 2019-yilda Jinoyat kodeksining 169-moddasi (o‘g‘rilik)da nazarda tutilgan jinoyatni sodir etganlikda aybdor deb topilib, 3 yil muddatga qamalgan. Keyinroq shartli ravishda muddatidan avval ozod qilingan.

Jinoyat ishlari bo‘yicha Shayxontohur tuman sudida mazkur pichoqbozlikda qatnashib, bir insonning o‘limiga sababchi bo‘lgan shaxsga hukm o‘qildi. Sudlanuvchi Jinoyat kodeksining 97-moddasi (qasddan odam o‘ldirish) 1-qismida ko‘rsatilgan jinoyatda aybli deb topilgan. U tayinlangan jazolarni qisman qo‘shish yo‘li bilan uzil-kesil 10 yil 1 oy muddatga ozodlikdan mahrum etilgan. Tayinlangan jazo qattiq tartibli koloniyalarda o‘talishi belgilangan.