Meksika ligasidan o‘rin olgan “Keretaro” va “Atlas” o‘rtasidagi o‘yin muxlislarning mushtlashuvi tufayli to‘xtatildi.
Tribunada ommaviy janjallar sodir bo‘lgandan so‘ng, 62-daqiqada o‘yin to‘xtatilgan. Xavfsizlik xizmati xodimlari muxlislar, jumladan ayollar va bolalar tribunani tark etishi uchun maydonga olib chiquvchi darvozalarni ochgan.
“Atlas”ning barcha futbolchilari, “Keretaro”ning esa ayrim vakillari maydonni tark etishga ulgurgan. “Keretaro”ning ayrim o‘yinchilari maydonda qolib, muxlislarni tinchlantirishga uringan.
Bir necha daqiqadan so‘ng futbol maydonining o‘zida ham mushtlashuvlar boshlanib ketgan. Ba’zilar bir-birini armatura va stullar bilan kaltaklagan.
Rasmiy ma’lumotlarga ko‘ra, tartibsizliklar oqibatida 22 kishi jarohatlangan, ularning 9 nafari shifoxonaga yetkazilgan, 2 kishi og‘ir ahvolda. Ayrim OAV 17 kishi halok bo‘lgani haqida yozmoqda.
Avvalroq Portugaliya chempionatida “Portu” va “Sporting” o‘rtasidagi bahs futbolchilarning ommaviy janjali bilan nihoyasiga yetgandi.
Izoh (0)