Chimyonda qor ko‘chish xavfi e’lon qilindi

Chimyon hududida qor ko‘chkisi xavfi e’lon qilindi. Bu haqda Favqulodda vaziyatlar vazirligi xabar qildi.

Qayd etilishicha, hududda 5-mart kunidan 16-mart kuniga qadar qor ko‘chkisi xavfi mavjud bo‘ladi.

“Ehtiyotkorlik choralarini ko‘rishingizni va ko‘chki xavfi mavjudligi haqidagi belgi bilan cheklangan joylarga kirmaslikni so‘raymiz”, — deyiladi xabarda.

Shuningdek, 5—6-mart kunlari A-373 Toshkent—O‘sh avtoyo‘lining Qamchiq dovoni hududida qor yog‘ishi, vaqti-vaqti bilan kuchli yog‘ingarchilik, tuman kuzatilishi, ko‘rinuvchanlik 50 metrgacha pasayishi, shamol tezligi 18-23 metr/sekundgacha kuchayishi, avtoyo‘lda yaxmalak va qor uyumlari yuzaga kelishi mumkin.

Favqulodda vaziyatlar vazirligi haydovchilardan barcha xavfsizlik qoidalariga rioya qilishni so‘ragan.