Oliy Majlis Qonunchilik palatasining yig‘ilishida “Davlat fuqarolik xizmati to‘g‘risida”gi qonun loyihasi deputatlar tomonidan ikkinchi va uchinchi o‘qishlarda ma’qullanib, Senatga yuborish to‘g‘risida qaror qabul qilindi.
Oliy Majlis Qonunchilik palatasi deputati Doniyor G‘aniyevning yozishicha, qonun loyihasi bilan O‘zbekiston davlat boshqaruvi va mahalliy hokimiyat idoralarida mehnat qilayotgan 120 mingdan ortiq davlat fuqarolik xizmatchilari faoliyati, ularning maqomi hamda huquq va majburiyatlari, shuningdek, davlat fuqarolik xizmatiga kirish hamda ushbu tizimda korrupsiya va manfaatlar to‘qnashuvining oldini olishga oid munosabatlarni tartibga solish ko‘zda tutilmoqda.
Qonun loyihasiga muvofiq, endilikda vakolatli organ (Davlat xizmatini rivojlantirish agentligi yoki xalq tilida “Argos”) tomonidan davlat fuqarolik xizmati lavozimlarining davlat reyestri yuritiladi hamda reyestrga kiritilgan lavozimlarga davlat xizmatchilari ochiq tanlov asosida tayinlanadi.
Reyestrga kiritilgan davlat fuqarolik lavozimlari guruh va toifalarga ajratilib, davlat xizmatchisiga uning lavozim guruhi va toifasidan kelib chiqib, malaka darajalari (chin) beriladi.
Vakolatli davlat organi tomonidan davlat xizmatchisi faoliyatini baholashning eng muhim samaradorlik ko‘rsatkichlari ishlab chiqiladi hamda davlat xizmatchisining munosib rag‘batlantirilishi va xizmat pog‘onasida ko‘tarilishi ana shu baholash tizimi natijalari asosida ta’minlanadi.
Shuningdek, qonun bilan davlat xizmatchisiga o‘zining daromadi va mol-mulki to‘g‘risida deklaratsiya topshirish (deklaratsiya topshirish tartibi va muddati alohida qonun bilan belgilanadi), o‘z xizmat faoliyatiga tashqi ta’sirlar oldini olish hamda o‘z vakolatidan foydalangan holda jismoniy va yuridik shaxslar faoliyatiga noqonuniy ta’sir o‘tkazmaslik majburiyatlarii yuklanmoqda.
Bundan tashqari, qabul qilingan qonun loyihasida davlat fuqarolik xizmatchisiga quyidagilar taqiqlanmoqda:
- o‘zaro yaqin qarindoshlik yoki quda-andachilikda bo‘lgan shaxslar bevosita bo‘ysunuv va nazorati ostidagi davlat fuqarolik xizmati lavozimini egallash;
- pedagogik, ilmiy va ijodiy faoliyatdan tashqari haq to‘lanadigan boshqa faoliyat bilan shug‘ullanish;
- tadbirkorlik faoliyati bilan shug‘ullanish yoki tadbirkorlik faoliyati tashkil etib, uning muassisi bo‘lish;
- o‘z mavqeyidan foydalanib yoki o‘z xizmat vazifasini bajarish evaziga jismoniy va yuridik shaxslardan har qanday turdagi mukofot yoki sovg‘a olish;
- chet el fuqaroligiga ega bo‘lish;
- respublika hududidan tashqarida bank hisobvaraqlari ochish, ko‘chmas va boshqa mol-mulkka egalik qilish.
“Umid qilamanki, mazkur qonunning qabul qilinib, ijroga qaratilishi mamlakatimizda davlat fuqarolik xizmatlari sifatini tubdan isloh qilishga, tizimda korrupsiya va manfaatlar to‘qnashuvini kamaytirishga, shuningdek, aholi orasida davlat xizmatchisi lavozimining jozibasini oshirib, iste’dodli va munosib fuqarolarga davlat xizmatchisi lavozimlariga kirish uchun teng imkoniyatlar yaratilishiga xizmat qiladi”, — deydi deputat.
Eslatib o‘tamiz, “Davlat fuqarolik xizmati to‘g‘risida”gi qonun loyihasi 2020-yil 22-maydan 6-iyungacha umumxalq muhokamasiga qo‘yilgandi. Loyiha bo‘yicha mingdan ortiq murojaatlar kelib tushgan. Bosh prokuror o‘rinbosari Svetlana Ortiqova ushbu loyihasi aynan davlat fuqarolik xizmatchilari orasida korrupsiyani tag-tugi bilan yo‘q qilishga qaratilganini ta’kidlagandi.
Korrupsiyaga qarshi kurashish bo‘yicha 2021—2022-yillarga mo‘ljallangan davlat dasturida 2021-yil 1-sentabrgacha “Davlat fuqarolik xizmati to‘g‘risida”gi loyihasini xorijiy ekspertlarning tavsiyalari va keng jamoatchilik fikri asosida takomillashtirish va hukumatga kiritish vazifasi qo‘yilgandi. 2021-yilning dekabrida Korrupsiyaga qarshi kurashish agentligi direktori Akmal Burhonov Qonunchilik palatasiga “Davlat fuqarolik xizmati to‘g‘risida”gi qonun loyihasi kiritilganini ma’lum qilgan edi.
Izoh (0)