Shavkat Mirziyoyev Mo‘ynoq faollari bilan uchrashuvda maktab o‘quvchilariga bepul ovqatlar berilishi to‘g‘risida so‘radi, deb xabar bermoqda “Daryo” muxbiri.
Davlat rahbari mas’ullardan Qoraqalpog‘istonda maktab o‘quvchilariga bepul ovqatlar berilayaptimi deb so‘radi. Qoraqalpog‘iston Respublikasi Vazirlar Kengashi raisi Qahramon Sariyev o‘quvchilar uchun ovqatlar berilayotganini tasdiqlagan.
Uning so‘zlariga ko‘ra, ayni vaqtda 142 ming nafar bolalar bepul ovqat bilan ta’minlanmoqda. “Hatto ba’zilari uylariga ham olib ketyapti”, — deydi u.
“Uyiga olib ketishsa ham mayli. Yesa, kuchli bo‘lsa, sog‘lig‘i tiklansa bo‘ldi. Nasib qilsa, pulimiz ko‘paygandan keyin uylariga ham qilib beramiz. Bu ham ‘Qoraqalpog‘iston tajribasi’ bo‘ldi. Buni endi boshqa viloyatlarda yo‘lga qo‘yamiz. Hali yuqori sinf o‘quvchilariga ham bu narsani joriy etamiz”, — degan Shavkat Mirziyoyev.
Eslatib o‘tamiz, Qoraqalpog‘iston va Xorazm viloyatida 2022-yil 1-aprelidan boshlab maktablardagi 1—4-sinf o‘quvchilarini bepul ovqat bilan ta’minlash tizimi joriy etiladi.
Avvalroq Shavkat Mirziyoyev Toshkentdan Qoraqalpog‘istonga kelib ishlaydigan tibbiyot xodimlarining maoshiga 100 foiz ustama haqi to‘lanishini aytgandi. Prezident mazkur yo‘nalishda qaror ishlab chiqish bo‘yicha topshiriq bergan. Toshkent viloyati mazkur yo‘nalishda 32 milliard so‘m ajratishi ma’lum qilingan.
Izoh (0)