Uzbekistan Airports ijtimoiy tarmoqlarda “Qarshi” xalqaro aeroportida odamlarning to‘planishi to‘g‘risida tarqalgan xabarlar yuzasidan ma’lumot berdi.
Ma’lum qilinishicha, 22-fevlal kuni erta tongda “Qarshi” xalqaro aeroportiga Qarshi—Moskva yo‘nalishi bo‘yicha Red Wings aviakompaniyasining parvozini amalga oshirish niyati bilan yo‘lovchilar kelishni boshlashgan. Mahalliy vaqt bilan soat 08:00 da aeroportda 150 nafar yo‘lovchi to‘plangan.
Biroq “Qarshi” aeroportida mazkur parvoz jadvalda mavjud bo‘lmagan. Ta’kidlanishicha, WZ-4492 reysi 22-fevral kuni soat 15:00 da Navoiy aeroportidan uchib ketishi kerak. Easy Booking va Atlas Avia tour onlayn-servislari orqali xarid qilingan chiptalarda parvoz Qarshidan soat 08:00 da amalga oshirilishi ko‘rsatilgan.
“Qarshi” aeroportining tushuntirishicha, ba’zi aviakassalar bir shahardagi yo‘lovchilar yetishmovchiligini boshqa shaharga sotish yo‘li bilan qoplaydi va yo‘lovchilarga jo‘nash shahri haqida ataylab noto‘g‘ri ma’lumotlarni beradi. Biroq shu bilan birga, ular transferni tashkillashtirishga majbur. Mazkur holatda Qarshidan Navoiyga transfer tashkil etilmagan. Yo‘lovchilar qo‘shni shaharga xususiy taksilarda o‘z hisobidan yetib borishga majbur bo‘lgan.
“Navoiy” aeroportining ma’lum qilishicha, WZ-4492 reysining yo‘lovchilar terminalga kelishni boshlagan. Ro‘yxatga olish ishlari soat 12:00 da boshlangan.
Uzbekistan Airports aviachiptalar savdosiga aloqasi yo‘qligini eslatib o‘tgan.
Eslatib o‘tamiz, 2021-yilning noyabrida Urganch aeroportida reysi jadvalda bo‘lmagan 290 nafar yo‘lovchi to‘plangandi. O‘shanda Avia Market kompaniyasi O‘zbekiston Transport vazirligi bilan parvozni kelishmagan va kerakli hujjatlarni tayyorlamagani aniqlangan edi. Keyinroq jadvalda bo‘lmagan reysga chipta sotgan Rossiya aviakompaniyasiga vaqtincha taqiq qo‘yilgan. Ko‘p o‘tmay taqiq olib tashlangan va aviakompaniya O‘zbekistonga parvozlarini qayta tiklagandi.
Izoh (0)