DXX hududlarda giyohvand moddalar savdosiga chek qo‘ydi (video)

Davlat xavfsizlik xizmati xodimlari joylarda giyohvand moddalar savdosiga qarshi tezkor tadbirlar o‘tkazdi, deb xabar bermoqda O‘zA.

Qayd etilishicha, DXXning Surxondaryo viloyati bo‘yicha boshqarmasi, Chegara qo‘shinlari hamda viloyat bojxona boshqarmasi xodimlari hamkorligida tezkor tadbir o‘tkazilgan. Unda Uzun tumanida yashovchi fuqaro (1991-yilda tug‘ilgan) davlat chegarasini noqonuniy kesib o‘tib, Tojikistondan 5 kilogramm 593 gramm opiy moddasini mamlakatga olib kelgan vaqtida qo‘lga olingan.

Shuningdek, tezkor tadbir davom ettirilib, uning Uzun tumanida yashovchi jinoiy sherigi (1996-yilda tug‘ilgan) hamda ushbu moddaning buyurtmachilari — Denov tumanida yashovchi aka-uka (1985 va 1990-yillarda tug‘ilgan) ham ushlangan.

DXX Qashqadaryo viloyati bo‘yicha boshqarmasi xodimlari viloyat IIB bilan hamkorlikda tezkor tadbir o‘tkazgan. Unda esa Termiz shahrida yashovchi fuqaro (1969-yilda tug‘ilgan) va uning 2 nafar o‘g‘li (1990 hamda 1992-yillarda tug‘ilgan) Cobalt avtomashinasida Toshkent shahri tomon ketayotgan vaqtida Chiroqchi tumanidagi “Umakay” YPX maskanida to‘xtatilgan.

Avtomashina ko‘zdan kechirilganda uning motor qismiga yashirib qo‘yilgan 1 kg gashish moddasi borligi aniqlanib, tegishli tartibda rasmiylashtirib olingan.

“Umakay” YPX maskanida qayd etilgan yana bir holatda Termiz—Toshkent yo‘nalishi bo‘yicha harakatlanayotgan Cobalt avtomashina to‘xtatilib tekshirilgan. Natijada unda yo‘lovchi sifatida ketayotgan muqaddam ikki marotaba giyohvand moddalar bilan bog‘liq jinoyat sodir etgani uchun sudlangan shaxsning (1959-yilda Denov tumanida tug‘ilgan) yonida 350 gr gashish va 65 gr opiy moddalari borligi aniqlangan. Moddalar protsessual tartibda rasmiylashtirib olingan.

Aniqlanishicha, uchinchi shaxslar tomonidan Tojikistondan kontrabanda yo‘li bilan olib o‘tilgan ushbu narkotiklar Toshkent shahrida sotilishi kerak bo‘lgan.

Farg‘ona tumanida yashovchi muqaddam giyohvand moddalar bilan bog‘liq jinoyat sodir etgani uchun sudlangan fuqaro (1966-yilda tug‘ilgan) 426 gr gashish moddasini Qirg‘izistondan kontrabanda yo‘li bilan olib o‘tib, shundan 107 grammini Buvayda tumanida yashovchi muqaddam sudlangan shaxsga sotayotgan vaqtida ularning ikkalasi ham qo‘lga olingan.

Shuningdek, uning boshqaruvidagi Cobalt avtomashina saloniga yashirib qo‘yilgan narkotik moddaning qolgan qismi ham aniqlanib, tegishli tartibda rasmiylashtirib olingan.

Namangan viloyatida kuzatilgan holatda esa Toshkent shahri tomon harakatlanib ketayotgan avtotransport vositasi Pop tumanida joylashgan “Namangan muntazam” YPX maskanida to‘xtatilib, ko‘zdan kechirilgan.

Natijada unda 2 ming 160 dona flakonda “Tropikamid” kuchli ta’sir qiluvchi dori vositasi borligi ma’lum bo‘lgan va protsessual tartibda olib qo‘yildi. Aniqlanishicha, Qirg‘izistondan noqonuniy olib o‘tilgan mazkur dori vositalari Namangan shahrida yashovchi muqaddam sudlangan shaxsga (1985-yilda tug‘ilgan) tegishli bo‘lgan.

Hozirda mazkur holatlar bo‘yicha jinoyat ishlari qo‘zg‘atilgan. Tergov harakatlari olib borilmoqda.