“Hozir yoki hech qachon”. “Real” Kilian Mbappeni ogohlantirdi

“Real” Kilian Mbappening “PSJ” bilan shartnomani uzaytirishi mumkinligidan xavotir olmoqda.

90 min xabariga ko‘ra, parijliklar fransuz futbolchisiga kosmik maosh bilan 2 yillik shartnoma taklif qilmoqda, madridliklar esa bunday maosh va’da qilolmaydi.

Ispan klubi mavsum oxirida futbolchining “Real”ga o‘tishi borasida og‘zaki kelishuv borligiga ishonchi komil, shu o‘rinda Mbappening “PSJ” bilan shartnomani uzaytirish variantini ham istisno qilinmasligini tushunyapti.

Shuning uchun rahbariyat hujumchini kelayotgan yozda jamoaga o‘tmasa, unga va’da qilingan mablag‘ boshqa futbolchilarga sarflanishi, bundan so‘ng Kilianni qo‘lga kiritishga urinishlar bo‘lmasligi haqida ogohlantirdi.

Avvalroq Fransiyaning amaldagi va sobiq prezidentlari Kilian Mbappega “PSJ”da qolishni maslahat bergani xabar qilingandi.

Mbappe joriy mavsum Fransiya chempionatida 23 ta o‘yinda maydonga tushib, 12 ta gol muallifiga aylandi.