“Barselona” Erling Holandga katta maosh va’da qilmoqda.
“Borussiya D” hujumchisiga top-jamoalar qiziqayotganiga qaramasdan, kataloniyaliklar hamon uni o‘z safiga qo‘shib olishga umid qilmoqda. “Barselona” norvegiyalik futbolchi uchun 75 million yevro miqdoridagi tovon pulini to‘lashga tayyor.
“Ko‘k-anorranglilar”da Holandi Kataloniyaga o‘tishga ko‘ndiruvchi sabablar mavjud. Ular 21 yoshli futbolchini klub yangi loyihasining asosiy yetakchisi bo‘lishiga ishontirmoqchi va uning atrofida yosh iste’dodlar bilan jamoa tuzmoqchi.
Undan tashqari, marketing nuqtai nazaridan ham Holandning “Barselona”ga o‘tishi unga foydali bo‘lishi mumkin. Chunki kataloniyaliklar ijtimoiy tarmoqlardagi obunachilar soni bo‘yicha yetakchi hisoblanadi.
Erling Ispaniyaga ko‘chib o‘tsa, uning yillik maoshi 20 million yevroni tashkil qiladi va jamoaning eng ko‘p maosh oluvchi futbolchisiga aylanadi.
Avvalroq, “Real” Erling Holand bilan dastlabki kelishuvga erishgani, bu kelishuvdan keyin Holandning vakillari boshqa klublar bilan muzokara olib borolmasligi xabar qilingandi.
Hujumchining dortmundliklar bilan shartnomasi 2024-yil iyun oyiga qadar mo‘ljallangan. U 2021/22-yilgi mavsumda barcha musobaqalarda 20 ta o‘yinda maydonga tushib, 23 ta golga mualliflik qildi.
Izoh (0)