18-fevraldan boshlab Toshkent shahar IIBB JXX YHXBning ikkita ro‘yxatdan o‘tkazish va imtihon olish bo‘limida haydovchilik guvohnomalarini yangi namunasiga almashtirish faoliyati yo‘lga qo‘yildi. Bu haqda IIV YHXBB axborot xizmati xabar berdi.
Ma’lum qilinishicha, Toshkent halqa avtomobil yo‘lida joylashgan Yunusobod hamda Bunyodkor shohko‘chasida joylashgan Chilonzor tumanlararo ro‘yxatdan o‘tkazish va imtihon olish bo‘linmalarida fuqarolarga qulaylik yaratish maqsadida eski namunadagi haydovchilik guvohnomalarini yangi namunasiga almashtirish faoliyati yo‘lga qo‘yilgan.
Hukumat qaroriga 2021-yilning 17-noyabr kuni kiritilgan o‘zgartirishlarga ko‘ra, O‘zbekistonda eski haydovchilik guvohnomasini almashtirish muddati 1 yilga uzaytirilgan. Bunda eski haydovchilik guvohnomasini yangi namunadagisiga almashtirish 2022-yil 31-dekabrga qadar davom etadi va qayta imtihon varaqasi talab etilmaydi.
Eslatib o‘tamiz, 3-fevral kuni Toshkentda haydovchilik guvohnomasini olish uchun imtihon topshirish bo‘yicha Toshkent imtihon markazi ish boshladi. Ichki ishlar vaziri o‘rinbosari, jamoat xavfsizligi departamenti boshlig‘i Bekmurod Abdullayev faqat yetarli bilim va malakaga ega haydovchilarga guvohnoma berilishni boshlagach, yo‘llarda haydovchilik madaniyati oshadi, yo‘l-transport hodisalari kamayishini aytib o‘tdi.
Izoh (0)