Prezident Shavkat Mirziyoyev mahallalar hayoti, sanoat loyihalari bilan tanishish maqsadida Toshkent shahri Yangihayot tumanida bo‘lib turibdi. Bu haqda Prezident matbuot xizmati xabar berdi.
Ma’lum qilinishicha, davlat rahbari dastlab “Almerro grupp” MChJning qandolat korxonasini ko‘zdan kechirgan.
Umumiy qiymati 70 milliard so‘m bo‘lgan ushbu korxona ikki bosqichdan iborat. O‘tgan yili noyabrda birinchi bosqichi ishga tushirilgan. Yangi bino qurilib, Turkiyadan zamonaviy texnologiyalar keltirib o‘rnatilgan.
Bugungi kunda korxona yiliga 2 ming tonnaga yaqin qandolat mahsulotlari tayyorlash quvvatiga ega. Bu yerda shokolad, konfet, pechenye, vafli kabi 95 turdagi mahsulot ishlab chiqariladi. 120 kishi ish bilan ta’minlangan. Prezident qandolat mahsulotlari sifatini ko‘rgan.
“Sifati yaxshi, chet elniki bilan bemalol raqobatlasha oladi. Faqat narxni tushirish bo‘yicha yana imkoniyat bor. Masalan, import qilinayotgan qo‘shimchalarni xomashyo shaklida olib, shu yerning o‘zida tayyorlash yo‘lga qo‘yilsa, tannarxni 10-15 foiz arzonlashtirish mumkin. Shunda mahsulotlar yaxshi sotilib, qo‘shimcha ish o‘rinlari ochish imkoniyati paydo bo‘ladi”, — deydi Shavkat Mirziyoyev.
Korxonaning ikkinchi bosqichi foydalanishga topshirilganidan so‘ng yillik quvvat 10 ming tonnaga yetadi. Mahsulotlarning bir qismini qo‘shni davlatlar va Mo‘g‘ulistonga eksport qilish mo‘ljallangan.
Izoh (0)