O‘zbekiston Milliy Olimpiya qo‘mitasi (MOQ) Ijroqo‘mi 17-fevral kuni navbatdan tashqari yig‘ilish o‘tkazdi.
Unda MOQ raisi Rustam Shoabdurahmonovning iste’fosi masalasi ko‘rib chiqildi. Qayd etilishicha, Shoabdurahmonov o‘z xohishiga ko‘ra ariza yozgan. Ijroqo‘m a’zolari mazkur qarorni ma’qullangan.
Rustam Shoabdurahmonov 2019-yilning may oyidan beri MOQ raisi sifatida faoliyat yuritib kelgandi. U mazkur lavozimda Umid Ahmadjonovning o‘rnini egallagandi.
Milliy Olimpiya qo‘mitasiga yangi rahbar MOQning navbatdan tashqari Bosh Assambleyasi yig‘ilishda saylanadi.
Ma’lumot uchun, Rustam Shoabdurahmonov 2001—2005-yillarda Toshkent shahar hokimi lavozimida faoliyat olib borgan. U shuningdek, turli yillarda Makroiqtisodiyot va statistika vaziri va vazir o‘rinbosari sifatida ham ishlagan, 1999—2004-yillarda Oliy Majlis deputati bo‘lgan. Shoabdurahmonov 2017-yildan beri O‘zbekiston Qilichbozlik federatsiyasi raisi hisoblanadi.
Izoh (0)