Qarshi shahridagi 1-sonli ixtisoslashtirilgan umumta’lim maktabi o‘quvchilarining maktab devoridan oshib tushgani va shahardagi 11-sonli maktab o‘quvchilari bilan mushtlashgani xabar berilgandi. “Daryo” so‘roviga javob bergan viloyat IIB axborot xizmati rahbari Javlon Baxtiyev bu bo‘yicha 12 nafar ota-ona javobgarlikka tortilganini ma’lum qildi.
Viloyat IIB axborot xizmatining aniqlik kiritishicha, maktab o‘quvchilarining o‘zboshimchaligi kecha, 16-fevral kuni soat 10:00 da sodir bo‘lgan.“Holat mas’ullar tomonidan o‘rganib chiqildi. Maktabda ota-onalar va maktab rahbariyati, shuningdek, Qarshi shahar IIB inspektor psixologlari ishtirokida muhokama yig‘ilishi bo‘lib o‘tdi. Va 12 nafar o‘quvchining ota-onasiga nisbatan ma’muriy javobgarlik to‘g‘risidagi kodeksning 47-moddasi 1-qismi bilan bayonnoma rasmiylashtirilib, tegishli tartibda chora ko‘rildi”, — deyiladi viloyat IIB axborot xizmati xabarida.
Avvalroq ushbu maktabda avval ham jamoatchilik e’tiroziga sabab bo‘lgan voqea — prokuror o‘g‘lining sinfxonada hojatini chiqarish hodisasi ro‘y bergani, uning ota-onasi ham javobgarlikka tortilgani xabar berilgandi.
Izoh (0)