Hozirda ilm-fan tufayli homiladorlik bilan bog‘liq qiyinchiliklarga duch kelgan ayollarga onalik quvonchini his qilishning bir necha usullari taklif qilinadi. Reproduktiv muammolar haqida so‘z borganda mashhur shaxslar ham bu muammoga duch kelishganini yashirmaydi.
AdMe nashri farzand ko‘rish bilan bog‘liq qiyinchiliklarni boshdan kechirgan taniqli ayollar haqida to‘xtaladi.
Enn Xeteuey
Mashhur Gollivud aktrisasi Enn Xeteuey hozirda ikki o‘g‘il — Jonatan va Jekning baxtli onasi, u uzoq vaqt davomida farzand ko‘rolmagani haqida shunday deydi: “Homilador bo‘la olmay yurgan vaqtimda kimdir farzandli bo‘lsa, atayin meni xafa qilish uchun shunday bo‘lyapti deb xafa bo‘lardim. Keyinchalik unday emasligini anglab yetdim. Xuddi shu muammoga duch kelgan ayollar men uchun homiladorlik yo‘li unchalik oson bo‘lmaganini bilishlarini istardim”. Aktrisaning aytishicha, unga qiyinchiliklarni yengishga boshqa ayollarning boshidan o‘tganlari va har doim yonida bo‘lgan eri yordam bergan.
Keyt Uinslet
“Titanik” filmidagi roli bilan mashhur bo‘lgan aktrisa bir muncha vaqt birinchi farzandi Mia kesarcha kesish amaliyoti bilan emas, tabiiy yo‘l bilan dunyoga kelgani haqida yolg‘on gapirganini tan oladi: “Men buni yashirish uchun juda ko‘p harakat qildim, axir o‘zim tug‘olmaganim uchun o‘zimni omadsiz ayoldek his qildim”.
Buyuk Britaniyadagi Ota-onalar xayriya tashkiloti vakili Keyt Uinsletning bayonotiga shunday izoh beradi: “Bu tufayli ayollarning o‘zini omadsiz deb o‘ylashini eshitish juda achinarli. Agar u shoshilinch shu qarorga kelingan bo‘lsa, demak, ona uchun xavfsiz yo‘l shu bo‘lgan”.
Emma Roberts
Yaqinda bergan intervyusida aktrisa Emma Roberts homilador bo‘lishga qiynalgani haqida gapirib berdi. Baxtli hodisadan bir necha yil oldin, tekshiruv vaqtida kelajakda yuzaga kelishi mumkin bo‘lgan muammolar tufayli aktrisaning tuxumdonini muzlatish tavsiya etilgan.
“Har doim homilador bo‘lish tabiiy jarayon deb o‘ylardim. Men bu muammoga duch kelgan boshqa ayollar bilan muloqot qila boshladim. Yolg‘iz emasligimni bilganimdan keyin o‘zimni xotirjam his qildim”, — deydi aktrisa. Emmani hayratda qoldirgani shundaki, u bu haqda tinmay o‘ylashni to‘xtatgandagina, homiladorlik tabiiy ravishda sodir bo‘ldi. 2020-yil oxirida Emma Rodos ismli o‘g‘il ko‘rdi.
Kortni Koks
40 yoshga to‘lishidan sal oldin “Do‘stlar” seriali yulduzi bir nechta muvaffaqiyatsiz urinishlardan so‘ng EKU orqali yagona qizi Kokoni dunyoga keltirdi. “Oilamda hech kim farzand ko‘rish bilan bog‘liq muammolarga duch kelmagandi. Shuning uchun bunga men duch kelishimni tasavvur ham qilolmasdim”, — deb eslaydi u. Kortnining so‘zlariga ko‘ra, uni mashhur qilgan serialdagi hazillardan butun dunyo kulgan bir paytda, u homilador bo‘lishga urinishda ruhiy og‘riqni boshdan kechirgan: “Homilamning nobud bo‘lishi Reychel farzandli bo‘lgan sahnalar suratga olinayotgan paytda sodir bo‘ldi. Xudoyim, o‘sha damda kulgili bo‘lish qanchalik dahshatli edi”, — deb xotirlaydi aktrisa.
Priyanka Chopra
Aktrisa Priyanka Chopra va uning turmush o‘rtog‘i, musiqachi Nik Jonas Instagram’dagi sahifalarida surrogat ona yordamida farzandli bo‘lishgani tufayli shaxsiy hayotlarini hurmat qilishni so‘rab izoh qoldirishdi. Baxtli voqeadan biroz oldin Priyanka Nik bilan farzand ko‘rishni xohlaysizmi, degan savolga kelajakda farzand ko‘rishga umid qilishlarini va agar bu sodir bo‘lsa, u va eri chaqaloqqa g‘amxo‘rlik qilish uchun ishlaridan osongina voz kechishlarini aytgandi.
Merayya Keri
2008-yilda Merayya Keri ochiqchasiga qo‘pollikka duch keldi: shou paytida boshlovchi Ellen DeJeneres qo‘shiqchidan homilador yoki yo‘qligini so‘rab qoldi. O‘sha vaqtda Merayya haqiqatan ham homilador edi, lekin bu haqda hech kimga aytgisi kelmasdi, chunki avvalgi homilasi nobud bo‘lgandi. Bunday vaziyatda u o‘zini noqulay his qildi, lekin u farzand kutayotganini tan olishi kerak edi. Bir muncha vaqt o‘tgach, qo‘shiqchi yana homilasidan ayrildi. U uzoq kutilgan farzandlari — egizaklar Monro va Marokanni 2011-yildagina dunyoga keltira oldi.
Selin Dion
Oilada 14-farzand bo‘lgan kanadalik qo‘shiqchi uchta o‘g‘il — Rene, Nelson va Eddining onasi bo‘lgunga qadar uzoq va qiyin yo‘lni bosib o‘tgan. 2001-yil yanvar oyida Nyu-Yorkdagi klinikada bepushtlik bo‘yicha davolangan va 2 ta kichik jarrohlik amaliyotidan so‘ng Selin Dionning birinchi o‘g‘li tug‘ilgan. 9 yil o‘tgach, 42 yoshli qo‘shiqchi oltita muvaffaqiyatsiz EKU urinishlaridan so‘ng egizaklarni dunyoga keltirdi.
Krissi Taygen
Amerikalik model va teleboshlovchi Krissi Taygen ham farzandlarini EKU yordamida dunyoga keltirgan. “EKU qilish bo‘yicha birinchi urinish muvaffaqiyatsiz tugadi, men o‘zimni ayblay boshladim. Ammo oxir-oqibat hamma narsa amalga oshishiga umid qilish kerakligini angladim”, — deydi u. Twitter foydalanuvchisi nima uchun u tabiiy yo‘l bilan homilador bo‘lolmagani haqida so‘raganida, Krissi 9 yil davomida farzand ko‘rishga uringanini, ammo bari zoye ketganini so‘zlab berdi. “Har gal kimdir mendan farzandli bo‘lolasizmi, deb so‘rasa: Bir kun tug‘ishni juda xohlaydigan, ammo tug‘a olmaydigan ayoldan shunday deb so‘rasang, u juda xafa bo‘ladi, deb javob qaytarardim”, — deydi model.
Sara Jessika Parker
Intervyularining birida aktrisa o‘g‘li Jeyms tug‘ilgandan so‘ng, turmush o‘rtog‘i aktyor Metyu Broderik bilan bir necha yil davomida yana farzand ko‘rishga urinishganini tan olgan. Hech qanday natija bo‘lmagandan so‘ng 2009-yilda surrogat ona yordamida ikki nafar farzandli bo‘lishdi. 44 yoshli aktrisa Marion va Tabita ismli egizak qizlarning onasi bo‘ldi. Surrogat onalik haqida gap ketganda Sara Jessika Parker: “Iloji bo‘lganida, o‘zim tug‘gan bo‘lardim”, — deydi.
Emma Tompson
“Garri Potter”, “Aql va hissiyot” va “Kruella” filmlaridagi rollari bilan tanilgan Emma Tompson 39 yoshida EKU yo‘li bilan yagona qizini dunyoga keltirdi. Keyinchalik ham britaniyalik aktrisa EKU yordamida yana homilador bo‘lishga bir necha bor urinib ko‘rdi, ammo barcha urinishlar muvaffaqiyatsiz tugadi. “Men chuqur klinik depressiyaga tushib qoldim, — deydi u. — Ammo endi qizimga uka yoki singil olib kelolmaganim uchun o‘zimni ayblamayman”. 2003-yilda Emma va uning turmush o‘rtog‘i, aktyor Greg Uayz o‘g‘il farzand asrab olishdi.
Mavzuga doir: Farzandini uyda dunyoga keltirgan mashhur onalar (foto
Izoh (0)