Ijtimoiy tarmoqlarda Toshkent viloyati Olmaliq shahridagi kafelardan birida mast holdagi erkak va ayollar o‘rtasida janjal sodir bo‘lgani aks etgan videolavhalar tarqalgandi. Viloyat Ichki ishlar bosh boshqarmasi matbuot kotibi Bobur To‘laganovning ma’lum qilishicha, holat yuzasidan jinoyat ishi qo‘zg‘atilgan.
11-fevral kuni soat 21:30 da Olmaliq shahar “Birdamlik” mahallasida joylashgan “Marhamat” restoranida 2 nafar erkak va 4 nafar ayol ishtirokida janjal sodir bo‘lgan. Tibbiy ko‘rik xulosasida ularning mast holda bo‘lgani aniqlangan.
Janjal ishtirokchilaridan birining so‘zlariga ko‘ra, mojaro ayollardan birining raqsga tushmoqchi bo‘lgan erkakka turtinib ketgani sabab yuzaga kelgan. Ushbu janjal ishtirokchilari bo‘lib o‘tgan voqeadan pushaymonligini bildirib, uzr so‘ragan. “Men o‘sha kuni borganim uchun pushaymonman, uyda o‘tirsam bo‘lar edi o‘zi”, — degan ayollarda biri.
Holat yuzasidan Jinoyat kodeksining 277-moddasi (bezorilik, ya’ni jamiyatda yurish-turish qoidalarini qasddan mensimaslik, urish-do‘pposlash, badanga yengil shikast yetkazish yoki o‘zganing mulkiga shikast yetkazish yoxud nobud qilish ancha zarar yetkazish) 2-qismi bilan jinoyat ishi qo‘zg‘atilgan. Hozirda tergov harakatlari olib borilmoqda.
Izoh (0)