Freedom Holding investitsion kompaniyasi PayBox Technologies xalqaro to‘lovlar tizimini sotib olmoqchi. Bu haqda xolding hisobotida xabar berilmoqda.
PayBox shtab-kvartirasi Qozog‘istonda joylashgan bo‘lib, bundan tashqari, kompaniya O‘zbekiston, Qirg‘iziston va Rossiyada ham faoliyat olib boradi.
Qayd etilishicha, shartnoma Qozog‘iston monopoliyaga qarshi kurashish qo‘mitasi tomonidan ma’qullanmoqda.
Xolding vakilining so‘zlariga ko‘ra, PayBox mobil telefon balansidan foydalangan holda to‘lov xizmatlarini ko‘rsatadi. Shuningdek, PayBox’da bank kartalari yordamida internet orqali to‘lovlarni amalga oshirish mumkin.
Kelajakda Freedom PayBox biznesini transformatsiya qilishni va Qozog‘istondagi Freedom Finance Bank’ning ekvayring to‘lov biznesini kuchaytirishni rejalashtirmoqda.
Bundan tashqari, mahalliy FFin-Bank bilan birgalikda ushbu kompaniyani Rossiyada rivojlantirish asosiy maqsadlardan biri.
Kompaniya kelishuv qiymatini oshkor qilishdan bosh tortdi.
Freedom Finance investitsion kompaniyasi 2018-yilning aprel oyidan boshlab O‘zbekistonda o‘z faoliyatini boshlagan. Kompaniya mamlakatda moliya brokerligi, investitsiya maslahatlari va bank xizmatlari kabi sohalarda ish yuritadi.
PayBox O‘zbekistonda Uzcard, Humo va boshqa to‘lov tizimlari bilan ishlaydi.
Avvalroq Freedom Holding xalqaro kompaniyasi asoschisi Timur Turlov O‘zbekistondagi investitsiya faoliyati to‘g‘risida gapirib o‘tgandi.
Izoh (0)