Andijon viloyatining Shahrixon tumanining “Qorako‘rpa” mahallasida joylashgan shifoxonada gaz portlagani haqida xabar berilgan edi. Favqulodda vaziyatlar vazirligi hodisa oqibatida bir kishi halok bo‘lganini ma’lum qildi.
Voqea 11-fevral kuni soat 11:30 da Chinobod ko‘chasida joylashgan 3 qavatli “Ziteriya” MChJ Diagnostika va davolash maskanining 1-qavatida yuz bergan.
Vazirlik e’lon qilgan dastlabki ma’lumotlarda hodisa oqibatida 7 kishi jabrlangani ma’lum qilingandi. Viloyat Favqulodda vaziyatlar boshqarmasining yong‘in-qutqaruv guruhi tomonidan olib borilgan qidiruv-qutqaruv ishlari natijasida bir kishi voqea joyida vafot etgani aniqlangan. Shuningdek, hodisa oqibatida turli darajada tan jarohati olib to‘rt nafar fuqaro tuman shifoxonasiga joylashtirilgan.
Xabarda aytilishicha, hodisa joyiga FVV rahbariyati, IIB, SSB, prokuratura va boshqa tegishli xizmat xodimlari yetib borgan.
Mazkur holat yuzasidan dastlabki tergovoldi surishtiruv ishlari olib borilmoqda.
Izoh (0)