Buyuk Britaniya bosh vaziri Boris Jonson London janubi-sharqiy Yevropani himoya qilish uchun “Tayfun” qiruvchi samolyotlari va harbiy kemalarni yuborish imkoniyatini ko‘rib chiqayotganini ma’lum qildi, deb xabar beradi The Times.
Uning hisoblashicha, Rossiyaning Ukrainaga nisbatan harakati NATOni Yevropadagi o‘z pozitsiyasini mustahkamlashga majbur etmoqda.
“Agar Rossiya yana bir bosqinchilik harakatini boshlasa, G‘arb Rossiya oldini olishga urinayotgan ko‘plab ishlarni amalga oshirishga majbur bo‘ladi. Aslini olganda, bu hozirda sodir bo‘lmoqda”, — deydi Jonson.
Bosh vazirning ma’lum qilishicha, Ukraina atrofidagi vaziyatning keskinlashuvi sabab “Amerika, Fransiya, Italiya va boshqa ittifoqchilar NATOning janubi-sharqiy qanotida o‘z kuchlarini to‘plamoqda, xuddi Buyuk Britaniya shimoli-sharqni mustahkamlayotgani kabi”.
Shu bilan birga, Ukraina inqirozini diplomatik yo‘llar bilan hal qilish imkoniyati Rossiya vaziyatning “deeskalatsiyasini” ta’minlasagina, saqlanib qolishini ta’kidlagan.
Muammolarni dialog orqali hal etish masalasini muhokama qilish uchun Buyuk Britaniya mudofaa vaziri Ben Uolles va mamlakat TIV rahbari Liz Trass yaqin kunlarda Moskvaga boradi.
Eslatib o‘tamiz, fevral boshida Boris Jonson Kiyevda Vladimir Zelenskiy bilan uchrashgan va u “rossiyalik askarning oyog‘i Ukraina chegarasini kesib o‘tgan daqiqada” Rossiyaga qarshi sanksiya qo‘llashga va’da bergandi.
Mavzuga doir:
Izoh (0)