O‘zbekistonga 28-yanvar, juma kuni Eron hududlaridan nam va salqin havo massalari kirib kelishi kutilmoqda, deb xabar beradi Respublika Gidrometeorologiya markazi. Mamlakat bo‘yicha ba’zi joylarda yomg‘ir yog‘adi, shimolda qorga aylanadi, faqat Farg‘ona vodiysi viloyatlarida yog‘ingarchilik kutilmaydi. Havo harorati 7-12 daraja iliq atrofida bo‘ladi.
29-yanvar, shanba kuni salqin havo massalari sharqqa siljiydi. Qoraqalpog‘istonda, Xorazm, Buxoro viloyatlarida yog‘ingarchilik to‘xtaydi, faqat respublikaning janubiy va markaziy tumanlarida kechasi va ertalab ob-havoning beqarorligi saqlanib turadi. Farg‘ona vodiysi viloyatlarida kun davomida yomg‘ir yog‘ishi kutilmoqda. Kunduz kungi havo harorati 3-8 daraja iliqqacha pasayadi.
28—29-yanvarda respublika bo‘yicha shamol tezligi 17-22 metr/sekundgacha kuchayishi kutilmoqda. 28-yanvarda Buxoro, Navoiy, Qashqadaryo, Jizzax viloyatlarida 25-28 metr/sekundgacha, 29-yanvarda Surxondaryo, Farg‘ona, Namangan, Andijon viloyatlarida 17-22 metr/sekundgacha kuchayishi mumkin.
Yakshanba kuni respublika bo‘yicha quruq va salqin ob-havo bo‘lishi kutilmoqda. Kechasi va ertalab ba’zi joylarga tuman tushadi. Havo harorati kechasi 3 daraja sovuq-2 daraja iliq, kunduzi 3-8 daraja iliq atrofida bo‘ladi.
Tog‘oldi va tog‘li hududlarda 28—29-yanvarda yog‘ingarchilik bo‘ladi, ba’zi joylarda kuchayishi mumkin, 30-yanvarda yog‘ingarchilik kutilmaydi. 28—31-yanvarda respublikaning tog‘li hududlarida qor ko‘chishi xavfi bor.
Izoh (0)