Elektr tizimidagi uzilishlar oqibatida yetkazilgan zarar hisob-kitob qilinadi — Moliya vazirligi

25-yanvar soat 11:00 larda O‘zbekistonda boshlangan elektr energiyasi uzilishi hamon davom etmoqda. Kutilmagan hodisa ko‘plab sohalarga, xususan, biznesga katta salbiy ta’sir ko‘rsatmoqda. “Daryo” muxbiri elektr tizimidagi davomli uzilishlarni iqtisodiy sohalarga qay darajada ta’sir qilganini aniqlash maqsadida Moliya vazirligi bilan bog‘landi.

Vazirlik matbuot kotibi Dildora Jo‘rayevaning ma’lum qilishicha, bu bo‘yicha hisob-kitoblar amalga oshiriladi.

“Hammasi vaziyatning tezroq tiklanishiga bog‘liq. Ayni paytda hududlarda elektr energiyasini tiklash ishlari boshlangan. Barcha hisob-kitoblar har bir tarmoqqa haqiqiy ta’sirni o‘rganilgandan so‘ng amalga oshiriladi”, — dedi vazirlik vakili.

Avvalroq O‘zbekiston elektr ta’minotidagi uzilishlar Qozog‘iston elektr tarmog‘ida katta avariya bo‘lishi sababli yuz bergani ma’lum qilingandi. Elektr energiyasidagi uzilishlar respublikaning Toshkent shahri va viloyati, Namangan, Samarqand, Jizzax va Qo‘qon shaharlarida kuzatilmoqda. Energetika vazirligi xabariga ko‘ra, ayni paytda mutaxassislar tomonidan nosozlikni tiklash ishlari olib borilmoqda.

Energetika vazirligi ma’lumotlariga ko‘ra, hozirda Toshkent viloyatidagi Chorvoq, Hojikent va Tovoqsoy gidroelektr stansiyalari, Navoiy viloyatidagi Navoiy issiqlik elektr stansiyasi, Qoraqalpog‘iston Respublikasidagi Taxiatosh issiqlik elektr stansiyasi hamda Farg‘ona viloyatidagi Farg‘ona issiqlik elektr markazi orqali energetika tizimiga quvvat uzatish boshlangan. “Daryo” nashri xodimlari va o‘quvchilarining xabar berishicha, Toshkent shahrining ayrim hududlarida elektr ta’minoti tiklanmoqda.