Samarqand tumanida 4 gektar yerni rasmiylashtirib berish evaziga fuqarodan 30 ming dollar talab qilgan advokat ushlandi. Bu haqda DXX Samarqand viloyati boshqarmasi “Daryo”ga ma’lum qildi.
Ma’lum qilinishicha, 20-yanvar kuni Davlat xavfsizlik xizmati va Bosh prokuratura huzuridagi iqtisodiy jinoyatlarga qarshi kurashish departamenti xodimlari hamkorligida noqonuniy yer sotish holatiga qarshi tezkor tadbir o‘tkazilgan.
Tadbir davomida Samarqand tumanida yashovchi, nufuzli advokatlik byurosi advokati A.T. o‘ziga ijara huquqi asosida berilgan “Jomboy davlat o‘rmon xo‘jaligi”ga tegishli bo‘lgan 4 gektar yer maydonini mahalliy fuqaro U.M.ga sotmoqchi bo‘lgani aniqlangan. Ular yerni 30 ming dollarga sotishga kelishgan. Advokat ko‘rsatilgan mablag‘ning 15 ming dollarini o‘z xizmat xonasida olayotgan vaqtda ashyoviy dalillar bilan ushlangan.
Hozirda advokat A.T.ga nisbatan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.
Avvalroq Farg‘onada prokuror 1000 dollar pora bilan qo‘lga tushgani, Samarqandda 0,25 gektar yerni 24 ming dollarga sotishga uringan Kadastr agentligi xodimi va uning sherigi ushlangani to‘g‘risida xabar berilgandi.
Mavzuga doir:
- Toshkent viloyatida 13,7 gektar yerni 3,4 mln dollarga sotmoqchi bo‘lgan investitsiyalar va tashqi savdo boshqarmasi xodimi ushlandi
- Toshkentda yerni noqonuniy olib bermoqchi bo‘lgan xonanda DXX tomonidan qo‘lga olindi
- Toshkentda 2,5 sotixli uy-joyni ofis uchun olib berishni va’da qilib, tadbirkorning 15 ming dollarini qo‘lga kiritgan shaxs aniqlandi
Izoh (0)