Toshkent viloyatining Nurafshon shahrida 27 yoshli o‘g‘il onasi bilan spirtli ichimlik ichib o‘tirgan shaxsni kaltaklab, uning o‘limiga sababchi bo‘ldi, deb xabar beradi Tergov departamenti.
Ma’lum qilinishicha, 17-yanvar kuni soat 21:30 larda 27 yoshli P.M. “Nurafshon” mahallasida joylashgan o‘zining yashash xonadonidagi ovqatlanish xonasiga kirib, shu yerda bo‘lgan onasi B.D. (55 yosh) tanishi N.R. (57 yosh) bilan birgalikda spirtli ichimlik iste’mol qilib o‘tirganini ko‘rgan. Bundan jahli chiqqan farzand N.R. bilan o‘zaro janjallashib, yog‘och bo‘lagi bilan uning chap son qismiga hamda tanasining duch kelgan joylariga qo‘li va oyog‘i bilan urib, tepib, tan jarohati yetkazgan.
Oqibatda N.R. olgan tan jarohatlari bilan Nurafshon shahar tibbiyot birlashmasiga olib kelingan, ko‘rsatilgan tez tibbiy yordamga qaramay, jabrlanuvchi vafot etgan.
Holat yuzasidan Nurafshon shahar IIB huzuridagi Tergov bo‘linmasi tomonidan P.M.ga nisbatan Jinoyat kodeksining 104-moddasi 3-qismi “d” bandi (jabrlanuvchining o‘lishiga sabab bo‘lgan qasddan badanga og‘ir shikast yetkazish) bilan jinoyat ishi qo‘zg‘atilgan. Hozirda tergov harakatlari davom etmoqda.
Avvalroq Buxoroda mast ota o‘ziga tanbeh bergan 18 yoshli o‘g‘lini pichoqlab o‘ldirgani, Samarqanddagi tashlandiq bog‘chada ikki yigit mast holatda tanish ayolni o‘ldirib, jasadini yoqib yuborgani to‘g‘risida xabar berilgandi.
Izoh (0)